ԵՐԵՎԱՆ, 8 նոյեմբերի – Sputnik. Մարտունիում առավոտյան հակառակորդը մի դիրք էր վերցնել, բայց օրվա ընթացքում ՀՀ պաշտպանության բանակին հաջողվել է հետ շպրտել հակառակորդին։ Հանրային հեռուստաընկերության եթերում այս տեղեկությունը հայտնեց ՀՀ ՊՆ ներկայացուցիչ Արծրուն Հովհաննիսյանը` ներկայացնելով, թե օրվա ընթացքում որ տարածքներում են մարտեր եղել և ինչ ընթացք են դրանք ունեցել։
«Մարտունիում այսօր հակառակորդն ահագին ուժեր էր մարտի մեջ մտցրել, սակայն զրահատեխնիկայի կորւստներ ունեցան ու հետ շպրտվեցին նորից։ Մարտունու ուղղությամբ կուտակումներ կային, և ես սպասում էի երկրորդ հարձակմանը, բայց չեղավ»,–ասաց Հովհաննիսյանը։
Նա հայտնեց նաև, որ Մատաղիսի ուղղությամբ այսօր որոշակի հարձակումներ են եղել։ Կիրառվել է հրետանի, սարքավորումներ, բայց որևէ հաջողության չեն հասել։
Բացի այդ, Հադրութից արևմուտք գտնվող ուղղությամբ բնագծեր կան, որտեղ ծանր մարտեր են ընթացել։ Այստեղ կուտակումներ են եղել, հիմա էլ կան, սակայն պաշտպանության բանակին հաջողվել է հետ մղել 1-2 գրոհ։ Համառ մարտերն այս ուղղությամբ շարունակվում են։
ՊՆ ներկայացուցչի խոսքով` այսօր Ադրբեջանի զինված ուժերն ավելի համառ էին գրոհում։ Նա նշեց, որ եթե վերահիշյալ տեղամասերից մեկում հայկական զինված ուժերին հաջողվի բեկում մտցնել, ապա կարող է իրավիճակ փոխվել։
Իսկ ինչ վերաբերվում է մայրաքաղաք Ստեփանակերտին, ապա Հովհաննիսյանը նշեց, որ երեկ երեկոյան Ստեփանակերտի մասին խուճապային գրառումներն իրեն էլ են տխրեցրել, բայց այսօր կապ է հաստատել ու պարզել` ամբողջ օրը նորմալ է եղել։ Չնայած այս հանգամանքին, մայրաքաղաքը շարունակվում է հրթիռակոծվել։
Ինչպես արդեն տեղեկացրել ենք, Մարտակերտում օրվա ընթացքում երկու անգամ հնչել է օդային տագնապի ազդանշանը։ Թշնամին քաղաքի վրա փորձել է կիրառել ռազմավիացիա։
Մարտունի քաղաքում իրադրությունը դարձյալ անհանգիստ է եղել։ Այստեղ կեսօրին թշնամական կողմը ծանր հրետանի է կիրառել` հարվածել քաղաքացիական ենթակառուցվածքներին։ Իսկ ահա, Ասկերանի, Քաշաթաղի և Շահումյանի շրջաններում հարաբերական հանգիստ իրավիճակը պահպանվել է։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 8-ի ժամը 15։30-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Ըստ վերջին տվյալների՝ Ադրբեջանի զինված ուժերը զրկվել է 264 ԱԹՍ-ից, 16 ուղղաթիռից, 25 ինքնաթիռից, 784 զրահատեխնիկայից, 6 ՏՕՍ-ից, 7660 կենդանի ուժից։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում
