ԵՐԵՎԱՆ, 8 նոյեմբերի — Sputnik. Պատերազմի առաջին 15 օրից հետո մեր կորուստները սկսել են նվազել։ Հանրային հեռուստաընկերության եթերում ասաց ՀՀ ՊՆ ներկայացուցիչ Արծրուն Հովհաննիսյանը` պատասխանելով հարցին, թե ինչպես է լուծվելու մարդուժի հարցը, քանի որ Ադրբեջանը դրսից անընդհատ վարձկաններ է բերում, մյուս կողմից` մեր ուժերն էլ սահմանափակ են։
«Ի վերջո, իրենք մտել են մեր տունը, մենք կռվում ենք մեր տան մեջ և մենք մեր տունը լավ գիտենք։ Մարդկային այնպիսի կորուստներ չենք կրում, որ սա լինի ներուժը սպառող պատերազմ։ Բացի այդ, մեր կորուստները սկսել են նվազել, քանի որ ավելի խելացի ենք կռվում, ավելի փորձառու ենք դարձել, մեր տեխնիկական հնարավորություններն են լավացել»,–ասաց Հովհաննիսյանը։
Ըստ Հովհաննիսյանի` մարդկային ներուժն այնպես չէ, որ որոշիչ է։ Մյուս կողմից էլ, մեր ազգն իր վերջին ճիգերն է դնում, ուստի անդադար վարձկաններ բերելը շատ բան չի փոխում, մանավանդ, դրսից բերվողները մեծ թիվ չեն կազմում Ադրբեջանի ԶՈւ–ում։
Հովհաննիսյանը հավելեց նաև, որ առաջիկայում Ադրբեջանի համար հեշտ չի լինելու եղանակի տեսանկյունից. Ադրբեջանը 1992-ից դեռ սկսած դաժան և դառը փորձ ունի ձմռանը իր լոգիստիկան ապահովելու տեսանկյունից։
Անդրադառնալով զորահավաքին` Հովհաննիսյանը նշեց, որ այն անցնում է իր բնականոն հունով, և անձանց, ում կանչում են, 99 տոկոսի դեպքերում ներկայանում են ժամանակին։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 8-ի ժամը 15։30-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Ըստ վերջին տվյալների՝ Ադրբեջանի զինված ուժերը զրկվել է 264 ԱԹՍ-ից, 16 ուղղաթիռից, 25 ինքնաթիռից, 784 զրահատեխնիկայից, 6 ՏՕՍ-ից, 7660 կենդանի ուժից։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում
