Արցախի Մարդու իրավունքների պաշտպան Արտակ Բեգլարյանը շարունակում է անգլերենով տեսանյութեր հրապարակել, որոնք պատմում են ադրբեջանական զինուժի թիրախում հայտնված խաղաղ բնակավայրերի, մասնավորապես՝ մայրաքաղաք Ստեփանակերտի մասին։ Հերթական տեսանյութն Արցախի ՄԻՊ-ը հրապարակել է Facebook-ի իր էջում։
Արտակ Բեգլարյանը կրում է զրահաբաճկոն, կանգնած է հրթիռակոծությունից տուժած բնակելի շենքերից մեկի առջև։
«Սա Ստեփանակերտի կենտրոնն է, որն այս գիշեր հրթիռակոծության է ենթարկվել։ Երաժշտական դպրոցն է վնասվել, նաև խանութն ու հյուրատունն են այրվել։ Ադրբեջանցիները թիրախավորել են Ստեփանակերտի նաև այլ քաղաքացիական շինություններ և ենթակառուցվածքներ, որոնց հետևանքով շատ ավերածություններ կան»,- տեղեկացնում է Արտակ Բեգլարյանը։
Նա շեշտում է՝ արբեջանա-թուրքա-ահաբեկչական ուժերը շարունակում են պատերազմական հանցագործություններն Արցախի խաղաղ բնակիչների դեմ։
Ավերված տներ, այրված ավտոմեքենաներ. ինչ տեսարան է բացվել լուսաբացին Ստեփանակերտում
«Նրանք սպանում են մեր բնակիչներին, տասնյակ հազարավոր տներ են ավերվել, սակայն միջազգային հանրությունը շարունակում է կույր լինել մարդկության դեմ ուղղված հանցագործությունների հանդեպ»,- ասում է պաշտպանը։
Նա ընդգծում է՝ չնայած միջազգային հանրության կուրությանն ու լռությանը՝ Արցախի ժողովուրդը շարունակելու է իր պայքարը մինչև վերջ։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 8-ի ժամը 15։30-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։
Ըստ վերջին տվյալների՝ Ադրբեջանի զինված ուժերը զրկվել է 264 ԱԹՍ-ից, 16 ուղղաթիռից, 25 ինքնաթիռից, 784 զրահատեխնիկայից, 6 ՏՕՍ-ից, 7660 կենդանի ուժից։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում
