ԵՐԵՎԱՆ, 7 նոյեմբերի - Sputnik. Ֆրանսիան անհետաձգելի բժշկական օգնություն կցուցաբերի Հայաստանին։ Այս մասին Facebook-ի իր էջում գրել է ՀՀ-ում Ֆրանսիայի արտակարգ և լիազոր դեսպան Ժոնաթան Լաքոտը:
Դեսպանը նշել է, որ Հայաստանի իշխանությունները մարդասիրական օգնության խնդրանքով են դիմել, և ֆրանսիական իշխանությունները որոշել են օգնել:
«Ֆրանսիան անհետաձգելի բժշկական օգնություն կցուցաբերի Հայաստանի Հանրապետության առողջապահության համակարգին՝ Հայաստան ուղարկելով օրթոպեդիայի և վերականգնողական ոլորտում մասնագիտացած վիրաբույժների, ինչպես նաև բժշկական սարքավորումներ ու դեղորայք»,-գրել է դեսպանը:
Ֆրանսիան այս քայլով ևս մեկ անգամ հաստատում է իր պատրաստակամությունը օգնելու պատերազմում վիրավորվածներին։
Նշենք, որ նախօրեին ռուսաստանցի 27 հայ բժիշկներ եկել են աշխատելու Հայաստանի և Արցախի հիվանդանոցներում։
Հիշեցնենք, որ հոկտեմբերի 13-ին Հայաստան էին ժամանել բժիշկներ Ֆրանսիայից։
