ԵՐԵՎԱՆ, 5 նոյեմբերի – Sputnik. Ֆրանսիայի արտգործնախարար Ժան-Իվ Լը Դրիանը հայտնել է, որ Թուրքիայի հանդեպ կարող են պատժամիջոցներ կիրառվել՝ երկու երկրների հարաբերությունների վատթարացման ֆոնին։ Նախարարը նման կարծիք է հայտնել Europe 1-ի եթերում։
Ֆրանսիայի արտգործնախարարը դատապարտել է Թուրքիայի նախագահ Ռեջեփ Թայիփ Էրդողանի կտրուկ հայտարարությունները Ֆրանսիայի ու երկրի ղեկավարության հասցեին։ Վերջերս թուրք նախագահն ավելի հաճախ է նման ելույթնե ունենում։
Հիշեցնենք, որ Էրդողանը մեղադրել էր Ֆրանսիայի նախագահ Էմանուել Մակրոնին, որը, այսպես կոչված, «լուսավոր իսլամի» ստեղծման գաղափար էր արտահայտել ու պաշտպանել էր ծաղրանկարելու իրավունքը (այդ թվում՝ Մուհամեդ մարգարեի), այդ կրոնի հանդեպ ատելության արշավանք կազմակերպելու մեջ։ Նա նաև մի քանի անգամ հրապարակայնորեն ասել էր, որ Մակրոնը «հոգեբույժի կարիք ունի»։
Լը Դրիանն ընդգծել է, որ Թուրքիայի նախագահի վիրավորանքներն ու «բռնության ու նույնիսկ ատելության» հայտարարություններն անթույլատրելի են, ու Եվրոպան միասնական է այդ հարցում։
Մակրոնը քնում ու արթնանում է իմ մասին մտածելով` նա ստուգվելու կարիք ունի. Էրդողան
«Դա ուղղված է ոչ միայն Ֆրանսիայի դեմ, Եվրոպան լրիվ համամիտ է այդ հարցում, ու մենք խստորեն պնդում ենք, որ Թուրքիան հրաժարվի նման տրամաբանությունից։ Եթե թուրքական կողմը չփոխի իր դիրքորոշումը, ճնշման միջոցներ ու հնարավոր պատժամիջոցների ծրագիր ունենք», - ասել է Լը Դրիանը։
Միաժամանակ նախարարը հիշեցրել է, որ «Եվրոպական խորհուրդը, որը միավորում է Եվրոպական միության 27 պետությունների ու կառավարությունների ղեկավարներին, որոշել է, որ անհրաժեշտ միջոցներ է կիրառելու թուրքական իշխանություններ նկատմամբ»
Հավելենք, որ երեկ՝ նոյեմբերի 4-ին, պաշտոնապես արգելվեց թուրքական «Գորշ գայլերի» գործունեությունը Ֆրանսիայում։
Հիշեցնենք` Լիոնի արվարձանում թուրքերն օրեր առաջ պղծել էին Օսմանյան կայսրությունում Հայոց ցեղասպանության զոհերի հիշատակը հավերժացնող հուշարձանը։ Անհայտ անձինք հուշարձանի սյուների վրա գրել են A. C. A. B («All cops are bastards» - «Բոլոր ոստիկանները սրիկաներ են»)։
Տեղեկություններ կան, որ դա հենց «Գորշ գայլերի» ձեռքի գործն է։ Դրանից հետո Լիոնի ՀՀ գլխավոր հյուպատոսության պատին «Գորշ գայլերը» նոր հակահայկական գրառում էին կատարել, որում հիշեցնում էին Հայոց ցեղասպանությունը և կազմակերպության հավատարմությունը Թուրքիայի նախագահ Ռեջեփ Թայիփ Էրդողանին։
Էրդողանի հայտարարությունը Մակրոնի հասցեին անընդունելի է Եվրամիության համար. Ժոզեպ Բորել
«Գորշ գայլերը» («Բոզքուրտ») 1948 թվականին գնդապետ Ալփարսլան Թյուրքեշի կողմից ստեղծված անկախ կազմակերպություն է։
Հավատարիմ է պանթուրքիզմի և նեոֆաշիզմի գաղափարախոսությանը։ Այն ահաբեկչական է ճանաչվել աշխարհի բազմաթիվ երկրներում։
