ԵՐԵՎԱՆ, 4 նոյեմբերի - Sputnik. Ռուսաստանը Ղարաբաղյան հակամարտության կարգավորման թեմայով անընդհատ շփման մեջ է Հայաստանի և Ադրբեջանի հետ և հույս ունի, որ կհաջողվի հասնել այնպիսի արդյունքների, որոնք կբավարարեն բոլորին ։ ՌԻԱ Նովոստիի փոխանցմամբ այս մասին հայտարարել է ՌԴ նախագահ Վլադիմիր Պուտինը կրոնական դավանանքների ներկայացուցիչների հետ տեսակոնֆերանսի ժամանակ հայտարարել է։
Պուտինն ընդգծել է, որ ռուսական կողմն անում է և անելու է իրենից կախված ամեն ինչ՝ ղարաբաղյան հակամարտությունը լուծման համար։
«Համենայնդեպս, մենք կապի մեջ ենք թե՛Հայաստանի, թե՛ Ադրբեջանի ղեկավարների հետ։ Հուսով եմ` մեզ կհաջողվի արդյունքի հասնել, ընդ որում՝ այնպիսի արդյունքի, որը կբավարարի տարածաշրջանում բնակվող բոլոր մարդկանց», - ասել է ՌԴ նախագահը։
Ռուսաստանի նախագահի կարծիքով ՝ Ղարաբաղում իրավիճակը կարելի է լուծել խաղաղ ճանապարհով` առանց պատերազմի։
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։
Մասնավորապես, կողմերը պայմանավորվեցին, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։ Հրադադարի վերաբերյալ պայմանավորվածությունից հետո Ադրբեջանը շարունակեց հրետակոծել Արցախը։
Հոկտեմբերի 17-ին ՀՀ արտգործնախարարությունը հայտնեց, որ Հայաստանի Հանրապետությունը և Ադրբեջանի Հանրապետությունը երկրորդ պայմանավորվածությունն են ձեռք բերել. որոշվել է հոկտեմբերի 18-ին, տեղական ժամանակով ժամը 00:00-ից հաստատել մարդասիրական զինադադար։
Արցախի ՊԲ–ն, սակայն, հոկտեմբերի 18-ի առավոտյան տեղեկացրեց, որ 07:20-ի սահմաններում հրետանային ակտիվ կրակից հետո ադրբեջանական զինուժը հարավային ուղղությամբ անցել է հարձակման: Երկուստեք եղել են զոհեր ու վիրավորներ:
Հոկտեմբերի 26-ին ՀՀ ԱԳՆ–ն հայտարարեց, որ Հայաստանի և Ադրբեջանի արտգործնախարարները հումանիտար հրադադարի հաստատման երրորդ ժամկետի մասին են պայմանավորվել, որը պետք է ուժի մեջ մտներ 2020թ. հոկտեմբերի 26-ին, տեղական ժամանակով 08:00-ին։ Սակայն Ադրբեջանը խախտեց նաև երրորդ պայմանավորվածությունը։
