ԵՐԵՎԱՆ, 4 նոյեմբերի – Sputnik. ԱՄՆ գործող նախագահ Դոնալդ Թրամփը ելույթ է ունեցել Սպիտակ տանը։ Նա հայտարարել է, որ ընտրությունների արդյունքները ֆենոմենալ են, իր թիմը հաղթում է։
«Ճիշտն ասած, մենք հաղթել ենք այս ընտրություններում․․․ Ուզում եմ շնորհակալություն հայտնել ամերիկացիներին անհավանական աջակցության համար։ Միլիոնավոր մարդիկ այսօր մեր օգտին են քվեարկել»,-ասել է նա։
Թրամփը նշել է, որ հանրապետականները հաղթել են այն նահանգներում, որտեղ հաղթելու հույս էլ չունեին։
«Մենք հաղթել ենք Ֆլորիդայում և հաղթել ենք մեծ տարբերությամբ։ Մենք հաղթել ենք հզոր Օհայո նահանգում, մենք հաղթել ենք Տեխասում․․․ նաև ակնհայտ է, որ մենք հաղթել ենք Ջորջիայում․․․ նրանք մեր հետևից չեն հասնի։ Բացի այդ, մենք հաստատ հաղթել ենք Հյուսիսային Կարոլինայում»,-ասել է Թրամփը։
ԱՄՆ նախագահը նշել է, որ ինքը հաղթում է նաև Փենսիլվանիայում, Միչիգանում և Վիսկոնսինում, իսկ Արիզոնայում դեռ շանսեր կան հաղթելու։
Մինչդեռ մի շարք նահանգներում, որոնք նշել է Թրամփը, բոլոր քվեները դեռևս հաշվարկված չեն, և հնարավոր չէ հստակ խոսել այս կամ այն թեկնածուի հաղթանակի մասին։
Նա հայտարարել է, որ պատրաստ է Գերագույն դատարանից պահանջել, որ դադարեցնեն փոստով վաղաժամկետ քվեարկության քվեաթերթիկների մշակումը՝ հնարավոր կեղծիքներից խուսափելու համար:
Ավելի վաղ Թրամփը կտրականապես դեմ էր արտահայտվել փոստով քվեարկությանը։ Նրա կարծիքով ՝ այդ դեպքում ընտրությունները խոցելի կլինեն արտասահմանյան միջամտությունների համար։ Մասնավորապես, Թրամփը հնարավոր է համարել, որ մյուս երկրները կարող են խլել քվեաթերթիկները կամ կեղծ քվեաթերթիկներ տպել։
«Խոսքը մեր ազգի պատմության ընթացքում մեծագույն խաբեության մասին է։ Մենք դիմելու ենք գերագույն դատարան։ Մենք ուզում ենք, որ քվեարկությունը կանգ առնի։ Մենք չենք ուզում, որ առավոտյան ժամը 4-ին հանկարծ ինչ-որ լրացուցիչ քվեաթերթիկներ հայտնաբերվեն, որոնք կավելացվեն քվեարկողների ցուցակին։ Մենք պետք է հաղթենք այս ընտրություններում, և ես համարում եմ, որ մենք հաղթել ենք»,-ասել է Թրամփը։
ԱՄՆ նախագահը ելույթը եզրափակել է՝ ի նշան հաղթանակի բռունցքն օդ պարզելով։
Նոյեմբերի 3-ին ԱՄՆ-ում տեղի են ունեցել պետության ղեկավարի և փոխնախագահի, Ներկայացուցիչների պալատի բոլոր 435 անդամների, Սենատի մեկ երրորդի (35 սենատորների), 11 նահանգների և երկու տարածքների նահանգապետների, ինչպես նաև որոշ նահանգների օրենսդիր ժողովների ընտրություններ:
