ԵՐԵՎԱՆ, 4 նոյեմբերի - Sputnik. Աշխարհահռչակ ռոք երաժիշտ Սերժ Թանկյանը կոչ է արել ստորագրահավաք կազմակերպել՝ ուղղված ԱՄՆ իշխանություններին, որը պետք է պատժի Թուրքիային՝ Ադրբեջանին F-16 ինքնաթիռներ ու անօդաչու թռչող սարքեր տրամադրելու համար:
«Խնդրում եմ՝ ստորագրեք Ադրբեջանին զինաթափելու և զենքի մատակարարումը դադարեցնելուն ուղղված փաստաթուղթը», - գրել է Թանկյանը Twitter-ի իր էջում ՝ հրապարակելով ստորագրահավաքի հղումը:
Please sign this petition to Disarm Azerbaijan with an arms embargo https://t.co/Ewkq6XddFl
— Serj Tankian (@serjtankian) November 4, 2020
«Զինաթափեք Ադրբեջանին, ապահովեք ԵԱՀԿ սպառազինությունների էմբարգոյի պահպանումը» խորագրով ստորագրահավաքը տեղադրված է Սպիտակ տան կայքում։
Հեղինակները գրում են, որ սեպտեմբերի 27-ին Ադրբեջանը ռազմական գործողություններ սկսեց Լեռնային Ղարաբաղում, որպեսզի վնասի և սպանի իրենց պատմական հայրենիքում խաղաղ բնակվող հայերին: Ղարաբաղն ավելի քան 2000 տարեկան է:
Նշվում է, որ հրետակոծությունն իրականացվում է բնակելի թաղամասերի վրա, կանայք և երեխաները ենթարկվում են հարձակման: Առաջին զոհը 9-ամյա աղջիկ էր:
«Մենք Միացյալ Նահանգների գործադիր, օրենսդիր և դատական իշխանություններին կոչ ենք անում ամեն ինչ անել, որպեսզի Ադրբեջանը զինաթափվի՝ ապահովելով ԵԱՀԿ որոշումը, որն ընդունվել է 1992 թվականին, ըստ որի՝ արգելում է զենք վաճառել և փոխանցել Ադրբեջանին, որը կարող է օգտագործվել Արցախի (Լեռնային Ղարաբաղ) դեմ: Պատժեք էմբարգոն խախտած անձանց, այդ թվում` Թուրքիային, որն Ադրբեջանին տրամադրում է F-16 ինքնաթիռներ ու անօդաչու թռչող սարքեր», - ասված է հայտարարության մեջ:
Այս պահին ստորագրահավաքին մասնակցել է շուրջ 57 հազար մարդ:
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 2-ի ժամը 19։00-ի դրությամբ` հակառակորդի կրակոցների հետևանքով Արցախում զոհվել են 1177 զինծառայողներ։ Քաղաքացիական անձանց շրջանում կա 46 զոհ ու 142 վիրավոր։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 7095 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 251 անօդաչու սարք, 16 ուղղաթիռ, 25 ինքնաթիռ, 685 զրահատեխնիկա, 6 ՏՈՍ համակարգ։
Ում պետք չէ ռազմաճակատ տանել. պատմության դասերը
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
«Բառերը քիչ են, որ նկարագրեմ». ռազմաճակատից եկած հոր ու նորածին դստեր 1–ին հանդիպումը
