ԵՐԵՎԱՆ, 29 հոկտեմբերի - Sputnik. Լեռնային Ղարաբաղի ճանաչումը կարող է արմատապես փոխել իրավիճակը։ Sputnik Արմենիայի հետ զրույցում նման հայտարարություն արեց ռուս ռազմական փորձագետ Ալեքսանդր Ժիլինը։
«Ղարաբաղի ճանաչումը կարող է արմատապես փոխել իրավիճակը, եթե համաշխարհային հանրությունն աջակցի այդ առաջարկին։ Այդ դեպքում խոսք կգնա ոչ թե վիճահարույց տարածքների, այլ այն մասին, որ կա ինքնիշխան պետական միավորում, թեկուզև փոքր», – նշեց Ժիլինը։
Նրա խոսքով` ցանկացած ագրեսիա անթույլատրելի կլինի, առավել ևս, որ Արցախը ցանկացածի հետ ուղղակիորեն կկարողանա ռազմական համագործակցության մասին համաձայնագիր ստորագրել։
«Տեղում կերևա, թե ում հետ նրանք կցանկանան գործ ունենալ` նույն Ռուսաստանի՞, թե՞ որևէ այլ մեկի հետ», – նշեց Ժիլինը։
Ըստ նրա` Ադրբեջանի նախագահ Իլհամ Ալիևը անդադար խոսում է տարածքները կորցնելու անհնարինության մասին, սակայն հարց է առաջանում. «Երբ Ադրբեջանը դուրս էր գալիս Խորհրդային Միությունից, ինչո՞վ էին առաջնորդվում։ Ժողովուրդների ինքնորոշման իրավունքով։ Այդ դեպքում ինչո՞ւ Արցախը նման իրավունք չունի։ Ինչո՞ւ եք դուք այդ միավորմանն արգելում ձեզնից անկախ լինել», – ասաց Ժիլինը։
Ինչպես նշեց փորձագետը, Ադրբեջանի նախագահը պետք է պատասխանի այս հարցին, այլապես կարելի է խոսել հանցավոր երեսպաշտության մասին։
Հիշեցնենք` սեպտեմբերի 27-ի վաղ առավոտյան Ադրբեջանը, Թուրքիայի աջակցությամբ, լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 28-ի ժամը 13։00-ի դրությամբ` հակառակորդի կրակոցների հետևանքով Արցախում զոհվել են 1068 զինծառայողներ և 39 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6749 զոհ ունի և բազմաթիվ վիրավորներ։
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 223 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 618 տանկ և ՀՄՄ:
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին
