ԵՐԵՎԱՆ, 29 հոկտեմբերի - Sputnik. Այս պահին ԱԳ արտաքին գործերի նախարար Զոհրաբ Մնացականյանը հանդիպում է Իրանի Իսլամական Հանրապետության արտաքին գործերի նախարարի տեղակալի հետ։ Լրագրողների հետ ճեպազրույցի ժամանակ ասաց ՀՀ արտաքին գործերի նախարարության խոսնակ Աննա Նաղդալյանը։
«ՄՆացականյանը հանդիպում է Իրանի արտաքին գործերի փոխնախարար Սեյեդ Աբաս Արաղչիի հետ։ Հանդիպման ավարտից հետո մանրամասներ կհայտնեմ»,–ասաց Նաղդալյանը։
Հիշեցնենք, որ Իրանի փոխարտգործնախարար Սեյեդ Աբաս Արաղչին նախօրեին որպես ղարաբաղյան կարգավորման հարցով Իրանի նախագահի հատուկ բանագնաց` այցելել է Բաքու, ապա Մոսկվա, իսկ Երևանից մեկնելու է Անկարա։
Արաղչիի այցերի հիմնական նպատակը տարածաշրջանային տերությունների մասնակցությամբ Ղարաբաղյան հակամարտության կարգավորման` իրանական նախաձեռնության մասին շահագրգիռ կողմերին տեղեկացնելն է։
Անդրադառնալով Իրանի հետ հարաբերություններին` Նաղդալյանը նշեց, որ Իրանը Հայաստանի հարևան երկիրն է, և Ադրբեջանի կողմից իրականացվող ագրեսիան սպառնալիք է ողջ տարածաշրջանի համար, ու այդ առումով Իրանը բացառություն չէ։
ԱԳՆ խոսնակը հայտնեց նաև, որ հոկտեմբերի 30-ին Մնացականյանը կմեկնի Ժնև, որտեղ նախատեսվում է հանդիպում ԵԱՀԿ Մինսկի խմբի համանախագահների հետ։ Ժնև այցի օրակարգը Հայաստանի համար հետևյալն է` առաջնայինը կրակի դադարեցումն է և վերիֆիկացիոն մեխանիզմների ներդրումը։
Նաղդալյանն ասաց, որ Ադրբեջանի գործողությունների հետևանքով խաղաղ բնակչության շրջանում ունենք ավելի քան 120 վիրավոր. նրանց մեծ մասը ծանր վիճակում է։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 29-ի ժամը 18։00-ի դրությամբ` հակառակորդի կրակոցների հետևանքով Արցախում զոհվել են 1166 զինծառայողներ և 39 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6749 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 226 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 632 տանկ և ՀՄՄ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին
