ԵՐԵՎԱՆ, 29 հոկտեմբերի – Sputnik. Ադրբեջանական ԶՈւ–ն հիմնովին ավերում է ժամանակավորապես իրենց տիրապետության տակ գտնվող տարածքները։ Լրագրողների հետ ճեպազրույցի ժամանակ այսպիսի հայտարարություն արեց ՀՀ ԱԳՆ խոսնակ Աննա Նաղդալյանը։
«Տարածքներն ավերելու նպատակն է, որպեսզի հետագայում բնիկ ժողովուրդը չբնակվի այդ վայրերում։ Ադրբեջանի նախագահի և ադրբեջանական զինված ուժերի գործողությունները ցույց են տալիս, որ նրանց նպատակն է հայաթափել Արցախը, նրանք Արցախը ցանկանում են առանց բնիկների»,–ասաց Նաղդալյանը։
Նա նշեց, որ Արցախի հայ բնակչության գոյությունը հնարավոր չէ Ադրբեջանի իրավասության ներքո։ Նաղդալյանը հիշեցրեց, որ Արցախի դեմ ագրեսիայի առաջին իսկ օրվանից պատերազմական գործողություններն ուղեկցել են մարդասիրական կոպիտ խախտումներով։ Մասնավորապես, խաղաղ բնակավայրերի հրետակոծումն իրականացվել է կասետային միջոցներով, որոնց հիմնական նպատակն է առավել մեծ վնաս հասցնել առաջնագծից հեռու գտնվող կանանց և երեխաներին։
ԱԳՆ խոսնակը վստահեցրեց` այս հանցագործությունները սոցցանցերում տարածվել են հենց հանցագործների կողմից։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 29-ի ժամը 18։00-ի դրությամբ` հակառակորդի կրակոցների հետևանքով Արցախում զոհվել են 1166 զինծառայողներ և 39 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6749 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 226 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 632 տանկ և ՀՄՄ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին
