ԵՐԵՎԱՆ, 19 հոկտեմբերի – Sputnik. «Բարգավաճ Հայաստան» կուսակցության առաջնորդ Գագիկ Ծառուկյանի խափանման միջոց կալանքը գրավով փոխարինելու միջնորդության`այսօր ընթացող քննությանը հետաձգվեց։ Նիստն ընթանում էր Երևան քաղաքի ընդհանուր իրավասության դատարանի Կենտրոն նստավայրում, դատավոր Մնացական Մարտիրոսյանի նախագահությամբ:
Լրագրողների հետ զրույցում Ծառուկյանի պաշտպան Երեմ Սարգսյանը նշեց, որ դատարանն իրենցից որոշակի փաստաթղթեր է պահանջել։
«Դատարանը մեզնից Ծառուկյանին գրավով ազատ արձակելու միջնորդության հիմնավորվածությանն առնչվող փաստաթղթեր պահանջեց։ Իսկ թե կոնկրետ ինչ փաստաթղթերի մասին է` այս փուլում հայտնել չեմ կարող»,–ասաց Սարգսյանը։
Նրա խոսքով` Ծառուկյանի պաշտպանները գործը քննող դատավորին ինքնաբացարկ հայտնելու միջնորդություն են ուզում ներկայացնել, սակայն ավելորդ ժամանակ չծախսելու համար նման քայլի չեն գնացել։ Սարգսյանը կարծում է, որ իրավական պրոցեսներ չեն ընթանում Ծառուկյանի նկատմամբ։
Պաշտպանն ասաց` դատարանը պետք է հաշվի առնի նաև հանրային շահը, իսկ եթե հիմա դրսում հարցում անեն, թե Ծառուկյանին պե՞տք է ազատ արձակեն, ապա, ըստ Սարգսյանի, 99 տոկոսը կասի` այո։ Պաշտպանը հայտնեց նաև, որ դատարանի հայեցողությանն են թողել գրավի չափը։
Դատական հաջորդ նիստը տեղի կունենա հոկտեմբերի 22-ին, ժամը 16։30-ին։
Գագիկ Ծառուկյանի կալանքի միջնորդությունը մերժած դատավորի նկատմամբ վարույթ կհարուցվի՞
Հիշեցնենք, որ այս օրերին արդեն երկու միջնորդություն էր ներկայացվել` Ծառուկյանին ազատ արձակելու առնչությամբ։ Ինչպես «Լուսավոր Հայաստանի» ղեկավար Էդմոն Մարուքյանի, այնպես էլ հայաստանյան 13 կուսակցությունների ներկայացրած միջնորդությունները մերժվել էին։
