ԵՐԵՎԱՆ, 14 հոկտեմբերի — Sputnik. Ադրբեջանը ոչ մի րոպե հավատարիմ չմնաց հրադադարի պահպանման պայմանավորվածությանը։ Իր ուղերձում այս մասին հայտարարեց ՀՀ վարչապետ Նիկոլ Փաշինյանը։
«Թուրք–ադրբեջանական նախնական պլանը` բլից–կրիկով գրավել ԼՂ–ն ու դրա հարակից տարածքները, ձախողվել է մեր բանակի շնորհիվ»,–ասաց Փաշինյանը։
Նրա խոսքով` Մոսկվայում ընդունված հայտարարությունը` հումանիտար հրադադար հայտարարելու մասին, հետագա կորուստները կանխելուն էր միտված։
Փաշինյանը հայտնեց, որ Ադրբեջանը մինչև հիմա շարունակում է հարձակումները` խոչընդոտելով հրադադարի պահպանման մոնիթորինգի պահպանմանը։
Նա նշեց, որ այս ընթացքում հակառակորդը հսկայական զինտեխնիկա է կորցրել, մեծ քանակի զոհեր ունեցել, բայց դրանց մի մասը վարձկան ահաբեկիչներ էին, ինչն առանձնապես ծանր չէին տանում Ադրբեջանում։ Իսկ մեզ համար ամեն կաթիլ արյունը մրմուռ է։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 14-ի ժամը 11:00-ի դրությամբ` հակառակորդի կրակոցների հետևանքով զոհվել են 532 զինծառայողներ և 31 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 5486 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 19 ինքնաթիռ, 16 ուղղաթիռ, 176 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 541 տանկ և ՀՄՄ:
«Ես կրակի տակ ամենաթանկ բանն եմ թողել՝ որդուս». ինչպես են ապրում արցախցիները Ջրամբարում
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Նույնիսկ ճանճը չի կարող խուսափել հայուհու դիպուկ հարվածից. արցախյան պատերազմի կանացի դեմքը
