ԵՐԵՎԱՆ, 8 հոկտեմբերի – Sputnik. Փարիզում Թուրքիայի դեսպանատան դիմաց այսօր բազմահազարանոց բողոքի ակցիա անցկացվեց: Ֆրանսահայ համայնքի ներկայացուցիչները հավաքվել էին հայկական եռագույնով, «Արցախը Հայաստան է» գրությամբ պաստառներով՝ աջակցություն հայտնելու Արցախին:
Ցուցարարները վանկարկում էին «Հաղթելու ենք»: Համայնքի առավել ակտիվ ներկայացուցիչները նշեցին, որ Թուրքիան ու Ադրբեջանը ահաբեկչական երկրներ են, իսկ Արցախը դեռ 30 տարի առաջ է ապացուցել, որ ազատ և անկախ լինելու իրավունք ունի:
«Հայաստանը Ֆրանսիային և աշխարհին Շառլ Ազնավուր, Միսաք Մանուշյան է տվել, իսկ Թուրքիա՞ն։ Նրանք չունեն այդպիսի մարդիկ։ Մի՞թե աշխարհը սա չի տեսնում»,– հայտարարեց համայնքի ներկայացուցիչ Ավետիս Ավետիսյանը։
Նա ընդգծեց` համայնքի ներկայացուցիչները հավաքվել են «ոչ» ասելու նոր ցեղասպանությանը։ Նրա խոսքով` մենք այլևս այն հայերը չենք, որոնց 105 տարի առաջ տանում էին Դեր–Զորի անապատներով։
Ավետիսյանը նաև շեշտեց, որ իրենք բոլորը թիկունքի զինվոր են։ Ե՛վ Հայաստանը, և՛ առաջնագծում կռվող զինվորները պետք է զգան այն ուժը, որ սփյուռքն է ներկայացնում։
Նա կոչ արեց բոլորին, ովքեր դեռ նվիրատվություն չեն կատարել «Հայաստան» համահայկական հիմնադրամի հաշվեհամարին, փոխանցում անել, իսկ ովքեր արդեն մասնակցել են համահայկական դրամահավաքին, կրկնեն իրենց նվիրատվությունը։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 8-ի ժամը 11։00-ի դրությամբ` հակառակորդի կրակոցների հետևանքով զոհվել են 324 զինծառայողներ և 19 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 4069 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 16 ուղղաթիռ, 145 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 496 տանկ և ՀՄՄ:
Փայլուն օպերացիա Արցախում. ազատագրվել է դիրքերից մեկը, փրկվել 19 զինվորի կյանք
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հեծանիվի անվադողը՝ «ժգուտ», պատկերասրահն էլ՝ տեսակավորման կայան. կամավոր դարձած հայություն
