Sputnik Արմենիայի թղթակցին հաջողվել է լինել ադրբեջանական ԶՈւ–ի կողմից երկու անգամ հրթիռակոծության թիրախ դարձած Սուրբ Ղազանչեցոց Ամենափրկիչ եկեղեցում և խոսել այնտեղ ապաստան գտած արցախցիների հետ։
Բնակիչները կարծել են` եկեղեցում անվտանգ է, ոչ ոք չի համարձակվի ռմբակոծել այն, բայց նրանք սխալվել են։
«Դուրս եկանք հաց առնելու, որ երեխեքն ուտեն, մեկ էլ էն կողմից տեսանք, որ եկեղեցուն խփեցին։ Վազելով եկանք, ասեցի` վայ, երեխեքս։ Եկանք, տեսանք` սաղ ծուխում կորած, թոզում կորած, հազիվ փրկարարները եկան, մեզ հանեցին... Եկեղեցին վառվում էր, հազիվ մեզ հանեցին էնտեղից»,– պատմում է կանանցից մեկը։
Մյուսը կինը, որին կատարվածից հետո ստիպված են եղել հանգստացնող դեղեր տալ, պատմում է, որ հարվածի պահին եկեղեցում եղել են ինքը, սկեսուրն ու երեխաները։
«Հարևանս եկավ, հասավ մեր ձենից, որ ծվծվացինք... մեծ տղամարդ է»,– պատմում է կինն ու ավելացնում, որ հազիվ հասցրեց հեռացնել երեխաներին։ Հարվածը հենց այնտեղ էր հասցվել, որտեղ երեխաներն էին կանգնած։
«Եկեղեցո՞ւն էլ են խփում... Վայ, Աստված, Աստված...Այ բալամ, ասանք` ապահովը եկեղեցին ա, շատ էինք իմացալ, որ եկեղեցուն էլ են խփելու»,– դողացող ձայնով ասում է նա։
Հիշեցնենք` Ադրբեջանն այսօր առավոտյան հրթիռակոծել էր Շուշիի Սուրբ Ղազանչեցող եկեղեցին, այդ պահին ներսում երեխաներ էին եղել։ Բարեբախտաբար, ոչ ոք չէր տուժել։
Դրանից հետո հրթիռակոծության հետևանքները լուսաբանելու համար եկեղեցի էին գնացել Արցախում աշխատող տեղական ու միջազգային լրատվամիջոցները:
Ադրբեջանական զինված ուժերը կրկին հրթիռակոծել էին եկեղեցին, և լրագրողները վնասվածքներ էին ստացել այդ հարվածներից։
Արցախի հրետակոծված շենքերի բնակիչները պատերազմի ավարտից հետո պետական փոխհատուցում կստանան
