ԵՐԵՎԱՆ, 7 հոկտեմբերի - Sputnik. Ամերիկյան հանրահայտ «Time» ամսագիրը հոդված է հրապարակել Արցախում ընթացող պատերազմի մասին, որի շրջանակում զրուցել է նաև Հայաստանի վարչապետ Նիկոլ Փաշինյանի հետ։
Նյութում Փաշինյանի խոսքը կասկածի տակ է դրված, հատկապես` ադրբեջանական բանակում կռվող ահաբեկիչների առկայության մասին։ Նախ` ամսագիրը չակերտների մեջ է դնում «ահաբեկիչներ» բառը հենց վարչապետի խոսքի մեջ, ինչով ցույց է տալիս իր թերահավատությունը։ Ապա կասկածի տակ է դնում նրանց թվի վերաբերյալ ասվածը` նշելով, թե Փաշինյանը հավաստիացնում է, որ ահաբեկիչները 1500-2000 են, մինչդեռ Ռուսաստանում Հայաստանի դեսպան Վարդան Տողանյանը 4000 է ասում։ Time–ը նաև նշում է, որ Փաշինյանը ոչ մի ապացույց չի բերում ահաբեկիչների` բանակում լինելու առկայության մասին։
Sputnik Արմենիան մեկնաբանության համար դիմեց Փաշինյանի խոսնակ Մանե Գևորգյանի հետ։
«Վարչապետի խոսքերն աղավաղված չեն, իսկ հոդվածի տեքստը լրագրողի անձնական դիտարկումներն են», – ասաց Գևորգյանը։
Նշենք նաև, որ Time-ի հոդվածի գլխավոր նկարը ադրբեջանական հերթական ֆեյքն է` Մինգեչաուրի ՋԷԿ–ի դիմաց հայտնված «հայկական» հրթիռը։ Հայկական կողմը պաշտոնապես հերքել է Մինգեչաուրի ուղղությամբ հրթիռներ արձակելու փաստը, բացի այդ մասնագետներն անհնար են համարում, որ հրթիռի հարվածից հետո այդ հատվածում հետքեր չլինեն, այնինչ լուսանկարում ասֆալտը գրեթե վնասված չէ, հրթիռի «ստեղծած» փոսն էլ կոկիկ է ու հավասարաչափ կլոր։
Բացի այդ, Time-ը նույն նյութում մեջբերում է Ադրբեջանի ԱԳՆ–ի խոսնակ Լեյլա Աբդուլաևայի խոսքերը, որը հավաստիացնում է, թե տարածաշրջանի խաղաղության համար անհրաժեշտ է վերացնել օկուպացիան։ Ի տարբերություն Փաշինյանի խոսքերի, Աբդուլաևայի խոսքերը ոչ միայն կասկածի տակ չեն դրվում, այլև չեն մեկնաբանվում առհասարակ։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 7-ի ժամը 16։00-ի դրությամբ` հակառակորդի կրակոցների հետևանքով զոհվել են 324 զինծառայողներ և 19 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3754 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 18 ուղղաթիռ, 128 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 416 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ
