Վարչապետ Նիկոլ Փաշինյանի՝ վերջին 1 տարում զորացրվածներին ուղղված մարտակոչից հետո Երևանի կենտրոնական հավաքակայանում երիտասարդների հոսքը չի դադարում։ Հայրենիքին պարտադիր ժամկետային ծառայությունն ամիսներ առաջ մատուցած երիտասարդները շտապում են կամավորագրվել ու մեկնել ռազմաճակատ։ ՀՀ կառավարության մամուլի ծառայությունը տեսանյութ է հրապարակել, որում կամավորագրվող երիտասարդներից մի քանիսը պատմում են իրենց տրամադրության, ոգևորության մասին։
«1 տարի առաջ եմ ավարտել ծառայությունս, չէի կարողանում գնալ և որպես կամավոր, և որպես պահեստազորային։ Վարչապետի կոչին հետևելով՝ առանց մեկ վայրկյան մտածելու տանից հագնվել ու դուրս եմ եկել»,- պատմում է կամավորագրվող երիտասարդներից մեկը։ Պատասխանելով այն հարցին, թե տանն ինչպես ընդունեցին իր որոշումը՝ ասում է՝ ընտանիքում հայրենիքի պաշտպանության համար պայքարող զինվոր լինելը նոր բան չէ։ Ավագ եղբայրը պահեստազորային է, հայրն էլ արդեն տասնութ տարի է զինվորական։
«Բավականին շատ գործեր ունեմ, գնամ, արագ ավարտենք ու շուտ հետ գամ»,- ասում է նա ու շտապում վայրկյան առաջ իր անունն ավելացնել կամավորների ցուցակում։
Երիտասարդներից մյուսն էլ պատմում է, որ ընդամենը հունվարին է զորացրվել։ Պատերազմի հենց սկզբից շտապել էր զինկոմիսարիատ կամավորագրվելու, սպասում էր իր հերթին, ու այն եկավ.
«Ամեն վայրկյան լինում է հաղթանակ, ամեն վայրկյան... Ես ունեմ ընկերներ ռազմի դաշտում, որոնք պայքարում են, որոնցից լավ լուրեր ենք լսում»,- ասում է երիտասարդներից մեկ ուրիշը։ Նա ընդգծում է՝ ոգևորող լուրերն այնքան շատ են, որ շտապում է հենց առաջին ավտոբուսով մեկնել ռազմաճակատ։
«Հասկանալի է, որ հիմա ամենակարևոր պահն է։ Երբ 3 միլիոնն 90 միլիոնի դեմ է կռվում, ուրեմն արդեն հաղթել ենք»,- եզրափակում է կամավորագրված երիտասարդը։
Հիշեցնենք՝ երեկ ՀՀ վարչապետ Նիկոլ Փաշինյանը Facebook-ի իր էջի ուղիղ եթերում մարտակոչով դիմեց վերջին 1 տարում զորացրվածներին ներկայանալ կենտրոնական հավաքակայան և միանալ հանուն հայրենիքի պայքարին։ Նա նշել էր՝ մեր օրենսդրությամբ վերջին մեկ տարվա ընթացքում զորացրվածները ենթակա չեն զորահավաքի, բայց նրանք են ամենամարտունակ մեր ռեսուրսը։
«Տղերք, հայրենիքն ունի ձեր կարիքը, սա մի նոր Սարդարապատ է։ Սա ոչ թե ուղղակի Արցախի հարցն է, այլ հայոց ցեղասպանությունը շարունակելու հարց է։ Մենք մեր ժողովրդին պետք է պաշտպանենք ցեղասպանությունից։ Եթե ոտքի չկանգնենք, ենթարկվելու ենք ցեղասպանության»,- հայտարարել էր վարչապետ Փաշինյանը։
Վարչապետի մարտակոչից հետո կամավորագրվել էր նրա որդին՝ Աշոտ Փաշինյանը։
