ԵՐԵՎԱՆ, 2 հոկտեմբերի – Sputnik. Մի քանի տասնյակ ակտիվիստներ, որոնց թվում հայեր, ադրբեջանցիներ և վրացիներ կային, այսօր հավաքվել էին Վրաստանի կառավարության շենքի դիմաց և կոչ էին անում աջակցել Արցախում խաղաղություն հաստատելու հարցում։
Ակտիվիստները գնացել էին վրացերեն, հայերեն և ադրբեջաներեն գրություններով. «Ո՛չ պատերազմին», «Պատերազմը հանցագործություն է», «Պատերազմ չեմ ուզում», «Կովկասն իմ տունն է»։
Ակտիվիստ Քրիստի Առաքելովան Aliq Media–ի լրագրողի հետ զրույցում ասել է, որ Վրաստանի էթնիկ փոքրամասնությունների` հայերի, ադրբեջանցիների համար շատ կարևոր է Հարավային Կովկասում խաղաղություն հաստատումը։
«Դրա համար մենք այստեղ ենք։ Մենք դեմ ենք ցանկացած պատերազմի։ Վրաստանը կարծում է, որ հակամարտությունը կարող է տեղափոխվել երկխոսության դաշտ։ Երկխոսությունն այլընտրանք չունի։ Մեր ցանկությունն է, որ կողմերը նստեն բանակցային սեղանի շուրջ», – ասել է Առաքելովան։
Նրա խոսքով` անթույլատրելի է երեխաների, զինվորների մահը, այդ պատճառով նրանք հույս ունեն, որ հակամարտության լուծման հարցում շահագրգռված քաղաքական գործիչները կմտածեն այս դիմակայության մեջ հայտնված յուրաքանչյուրի կյանքի մասին։
Ավելի վաղ Վրաստանի հասարակական կազմակերպությունները և էթնիկ ադրբեջանցիներն ու հայերը «Խաղաղության մանիֆեստ» էին ստորագրել, որում կոչ էին արել Վրաստանի կառավարությանը չեզոքություն պահպանել ղարաբաղյան հակամարտության կապակցությամբ:
Ինչպես նշված է փաստաթղթում, Կովկասում խաղաղության և կայունության պահպանումը առանձին երկրների և ողջ տարածաշրջանի զարգացման նախադրյալն է, և կառավարությունները դա չպետք է խախտեն։ Նրանք Վրաստանի կառավարությանը հորդորել են նաև խիստ չեզոքություն պահպանել և հնարավորությունների շրջանակում հումանիտար և այլ միջոցներ ձեռնարկել երկու երկրներում տուժած քաղաքացիներին օգնություն ցուցաբերելու համար։ Վրաստանի իշխանություններին առաջարկվել է ակտիվ քայլեր ձեռնարկել կողմերի միջև բանակցություններին աջակցելու համար։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 2-ի ժ. 12-ի դրությամբ` հակառակորդի կրակոցների հետևանքով զոհվել են 158 զինծառայողներ և 7 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 1750 զոհ ունի, 2700 վիրավոր։
«Մենք ձեզ սնիկերս, դուք մեզ` խոցված տանկեր». աղջիկների գրությունները զինվորներին
Արցախում և Հայաստանում ռազմական դրություն և համատարած զորահավաք է հայտարարվել։
«Մենթալիտետն է բարբարոսական». գնդապետը ռուսաստանցի լրագրողի հարցին պատասխան չգտավ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։ Եվս մեկ խաղաղ բնակիչ էլ զոհվել է Գեղարքունիքի մարզում։
Օրվա կադր. մարտադաշտից դուրս պայքար` հանուն կյանքի
