ԵՐԵՎԱՆ, 28 սեպտեմբերի – Sputnik. ՀՀ արտաքին գործերի նախարար Զոհրաբ Մնացականյանն Ադրբեջանի սանձազերծած գործողությունների առնչությամբ մոտ երկու տասնյակ գործընկերների հետ է հեռախոսազրույց ունեցել։ Լրագրողների հետ ճեպազրույցում հայտնեց ՀՀ ԱԳՆ խոսնակ Աննա Նաղդալյանը։
«ԱԳՆ–ն շարունակական կապ է պահում միջազգային գործընկերների հետ։ Ունենք միջազգային հանրության միանշանակ աջակցությունը, որը դատապարտում է ուժի կիրառումը և տարածաշրջանի կայունությանն խաթարմանն ուղղված ջանքերը»,–ասաց Նաղդալյանը` նշելով, որ Մնացականյանը կապի մեջ է նաև ԵԱՀՄ Մինսկի խմբի համանախագահների հետ։։
Նրա խոսքով` բախվելով միջազգային հանրության կարծիքին` Բաքուն սկսեց ապատեղեկատվություն տարածել, թե հայկական կողմն առաջինն է սկսել հարձակումը։ Սակայն մինչ այդ միջազգային հանրությունն արդեն իսկ դատապարտել էր Ադրբեջանի քայլերը։
Նաղդալյանը հայտնեց, որ Հայաստանը գիտի` ում է ուղղված միջազգային հանրության` խաղաղության գնալու կոչը։ Նա վստահեցրեց` ունենք փաստական, անհերքելի ապացույցներ, թե որ կողմն է սկսել ռազմական գործողությունները։
«Նոր պատերազմը պետք է կանխել». ԵՄ–ն դիմել է ղարաբաղյան հակամարտության կողմերին
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Ըստ վերջին տեղեկությունների` ադրբեջանական զինուժը կորցրել է 5 ուղղաթիռ, 27 անօդաչու թռչող սարք, 43 տանկ և ՀՄՄ, 2 ինժեներական զրահատեխնիկա։ Մարտերը շարունակվում են։
Հայաստանը ՄԻԵԴ-ին նոր փաստեր է ներկայացրել Ադրբեջանի գործողությունների վերաբերյալ
Հակառակորդի կրակոցների հետևանքով զոհվել են 58 զինծառայողներ և 2 քաղաքացիական անձինք։ Հայկական կողմը շուրջ 200–վիրավոր ունի։ Հակառակորդի կորուստներն անհամեմատ մեծ են։ Արցախում և Հայաստանում ռազմական դրություն և համատարած զորահավաք է հայտարարվել։
Ադրբեջանի գործողությունների առնչությամբ Հայաստանի ՔԿ–ն քրգործ է հարուցել
