ԵՐԵՎԱՆ, 28 սեպտեմբերի - Sputnik. ՀՀ ԶՈւ–ն արդեն կասեցրել է թշնամու գրոհը, և բանակն ի վիճակի է գործողությունները տեղափոխել Ադրբեջանի տարածք։ Լրագրողների հետ ճեպազրույցի ժամանակ նման հայտարարություն արեց ԱՀ ԱԺ նախագահ Արթուր Թովմասյանը։
«Բանակը պատրաստ է այս մարտի ելքը վճռել այնպես, ինչպես եղավ 1992-94-ին, 2016-ի ապրիլյան պատերազմի ժամանակ կամ էլ այս տարվա հուլիսյան մարտերի ժամանակ»,–ասաց Թովմասյանը։
Նրա խոսքով` այս պատերազմին խառնվել է նաև Թուրքիան, և այժմ Ադրբեջան–Թուրքիա տանդեմն է աշխատում առաջնագծի երկայնքում։
Թովմասյանն ասաց, որ ընթացող մարտական գործողությունների վերաբերյալ ԵԱՀԿ Մինսկի խմբի համանախագահները հավասարակշիռ մեկնաբանություններ են տվել։
Նա նշեց` Ադրբեջանն ասում է, թե Արցախի հարցը խաղաղ ճանապարհով հնարավոր չէ լուծել։ Թովմասյանն ասաց` Ադրբեջանն իրենց հետ թնդանոթների լեզվով է խոսում, թնդանաթով էլ պատասխան են ստանալու։
Անդրադառնալով Հայաստանի կողմից Արցախի անկախության ճանաչմանը` Թովմասյանը նշեց, որ դա կարող է զսպաշապիկ լինել Ադրբեջանի համար։
Հիշեցնենք` սեպտեմբերի 27-ի ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Ըստ վերջին տեղեկությունների` ադրբեջանական զինուժը կորցրել է 5 ուղղաթիռ, 36 անօդաչու թռչող սարք, 47 տանկ և ՀՄՄ, 2 ինժեներական զրահատեխնիկա։ Մարտերը շարունակվում են։
Արսեն Թորոսյանն այցելել է վիրավոր զինծառայողներին. լուսանկարներ
Հակառակորդի կրակոցների հետևանքով զոհվել են 58 զինծառայողներ և 2 քաղաքացիական անձինք։ Հայկական կողմը շուրջ 200– վիրավոր ունի։ Հակառակորդի կորուստներն անհամեմատ մեծ են։ Արցախում և Հայաստանում ռազմական դրություն և համատարած զորահավաք է հայտարարվել։
Հայ բարձրաստիճան զինվորականի մահվան մասին լուրերը սուտ են. Հովհաննիսյան
