ԵՐԵՎԱՆ, 28 սեպտեմբերի – Sputnik. ՀՀ արտաքին գործերի նախարարությունը դիվանագիտության մեջ նախապես չի ներկայացնում այն քայլերը, որոնք պետք է իրականացնի։ Լրագրողների հետ ճեպազրույցի ժամանակ ասաց ՀՀ ԱԳՆ խոսնակ Աննա Նաղդալյանը` պատասխանելով հարցին, թե արդյո՞ք օրակարգում կա ՀՀ–ի կողմից Արցախի ճանաչման հարցը։
«Զարմանալի չէ, որ այս փուլում հանրության շրջանում շատ է խոսվում Արցախի անկախության ճանաչման գործիքակազմի մասին։ Արցախի ժողովրդի անվտանգության պահպանման երաշխավորման ուղղությամբ ԱԳՆ-ի կողմից կա գործիքակազմի հստակ ցուցակ, որը գործի է դրվում ըստ իրադրության զարգացման»,–ասաց Նաղդալյանը։
Նա ևս մեկ անգամ շեշտեց, որ այդ ամենն արվում է Արցախի ժողովրդի անվտանգության ապահովման համար։ Նաղդալյանը նշեց` այս թեմայի առնչությամբ ավելին ասել չի կարող։
ՀՀ վարչապետ Նիկոլ Փաշինյանը սեպտեմբերի 27-ին հայտնել էր, որ Արցախի անկախության ճանաչումը Հայաստանի քաղաքական իշխանության օրակարգում կա:
Նա նաև հայտնել էր, որ ներկա պահին այդ հարցը չի քննարկվում, բայց և չբացառեց, որ կքննարկվի:
Հիշեցնենք, որ սեպտեմբերի 27–ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով, որը շարունակվում է նաև այսօր։
Մարտակերտում Ադրբեջանը կրակել է հայ լրագրողների ուղղությամբ. տեսանյութ
Ըստ վերջին տեղեկությունների` ադրբեջանական զինուժը կորցրել է 5 ուղղաթիռ, 27 անօդաչու թռչող սարք, 43 տանկ և ՀՄՄ, 2 ինժեներական զրահատեխնիկա։
Հակառակորդի կրակոցների հետևանքով քաղաքացիական բնակչությունից Մարտունիում մեկ կին և մեկ երեխա են զոհվել, զոհվել են նաև 58 զինծառայող։ Հայկական կողմը շուրջ 200 վիրավոր ունի։
Հակառակորդի զրահատանկային լայնածավալ գրոհը կասեցված է. տեսանյութ
Հակառակորդի կորուստներն անհամեմատ մեծ են։ Մարտերը շարունակվում են։
Արցախում և Հայաստանում ռազմական դրություն և համատարած զորահավաք է հայտարարվել:
