ԵՐԵՎԱՆ, 12 սեպտեմբերի - Sputnik. Հայաստանում ալկոհոլային թունավորումից մահվան ևս 1 դեպք է գրանցվել։ Լուրը հաղորդում է ՀՀ առողջապահության նախարարության մամուլի ծառայությունը։
«Օգոստոսի 31-ից սեպտեմբերի 12-ն ընկած ժամանակահատվածում Հայաստանում արձանագրվել է ալկոհոլային թունավորման 46 դեպք (մեթանոլ), որից 21-ը մահվան ելքով, իսկ 25-ը բուժում ստանալուց հետո դուրս է գրվել»,- նշված է հաղորդագրության մեջ:
Առողջապահության նախարարությունը կոչ է անում զերծ մնալ անհայտ ծագման, ոչ գործարանային արտադրության ոգելից խմիչք օգտագործելուց։
Մասնագետները ևս մեկ անգամ հիշեցնում են էթիլ և մեթիլ սպիրտից սուր թունավորման առաջին ախտանշանները։ Էթիլի սպիրտի դեպքում դրանք են սրտխառնոց, որովայնի ցավ, գլխացավ, գլխապտույտ, անհավասարակշռություն, քնկոտություն, ատաքսիա, կոմա, ցնցումներ, շնչառության խանգարում, ճնշման իջեցում, սրտի դանդաղ աշխատանք, մարմնի ջերմաստիճանի իջեցում, հիպոգլիկեմիա և այլն:
Մեթիլ սպիրտի պարագայում, կախված թունավոր նյութերի քանակից, թունավորման ախտանշանները կարող են ի հայտ գալ մի քանի ժամից մինչև 1-2 օրվա ընթացքում։ Հիմնական ախտանշաններն են՝ գլխապտույտ և գլխացավ, սրտխառնոց և փսխում, մկանային, հոդերի և որովայնի ցավ, գիտակցության մթագնում, քնկոտություն, լուսավախություն, սպեցիֆիկ ազդեցություն տեսողության վրա՝ ընդհուպ մինչև կուրություն և այլն։
Նախարարությունը շեշտում է՝ այս ախտանշանների ի հայտ գալու դեպքում անհրաժեշտ է անմիջապես դիմել բժշկի և չզբաղվել ինքնաբուժմամբ։
Հիշեցնենք` օգոստոսի 31-ից սեպտեմբերի 11-ն ընկած ժամանակահատվածում Հայաստանում արձանագրվել է ալկոհոլային թունավորման 46 դեպք։ Դեպքերից 29-ը արձանագրվել է Արմավիրի մարզում, 15-ը Երևանում, 2-ը Կոտայքի մարզում։
Եվս 1 հոգի է մահացել ալկոհոլային թունավորումից. ինչպես են մյուս թունավորվածները
Առողջապահության նախարարությունը սեպտեմբերի 1-ին հայտարարեց, որ Արմավիրում ալկոհոլային թունավորման հետևանքով 9 մարդ է մահացել։ Նույն օրը ՀՀ քննչական կոմիտեն հայտնեց` ձերբակալվել է Արմավիրի բնակիչ Աշոտ Հովսեփյանը` անվտանգության պահանջներին չհամապատասխանող օղի վաճառելու համար։ Քննչական կոմիտեն հորդորում էր, որ բոլոր նրանք, ովքեր օղի են գնել Հովսեփյանից չխմեն այն։
Sputnik Արմենիան այցելել էր Արմավիր` Աշոտ Հովսեփյանի բնակության վայր` դեպքի առնչությամբ մանրամասներ իմանալու։ Նրա հարևաններն ասում էին, որ Աշոտը հանուն շահի օղու մեջ ոչ պիտանի սպիրտ չէր կիրառի և, ամենայն հավանականությամբ, նրա «գլխին սարքել են»։ Աշոտ Հովսեփյանն այս պահին կալանավորված է։
