Ջինսեր հագնել սիրում են գրեթե բոլորը, բայց Հայաստանում հիմնականում գնում են չինական կամ թուրքական արտադրության տաբատներ։ Մինչդեռ երկու տարի առաջ Գյումրիում բացվեց յուրօրինակ գործարան, որը երկրում միակն է, որ մասնագիտացված է միայն ջինսերի արտադրության մեջ և նաև ամենամեծն է։
Զաքարյանների ընտանիքը 2 միլիոն դոլար է ներդրել բրենդի արտադրության մեջ և հաջողակ բիզնես սկսել։ Հենց առաջին տարում Գյումրի են հրավիրել իտալացի մասնագետների, որոնք իրենց մասնագիտական գիտելիքները փոխանցել են տեղացի դերձակներին։ Սկզբում գործարանում 50 աշխատող կար, այժմ նրանց թիվը հասել է 120-ի։
«Արտադրանքի 70%-ը արտահանվում է արտասահմանյան ընկերություններին` աուտսորսինգի տեսքով։ Այսինքն` մենք փոխանցում ենք մեր արտադրանքը այլ ընկերությունների, որոնք էլ իրենց բրենդի պիտակները փակցնում են դրա վրա։ Իսկ մնացած 30%-ն արդեն մեր բրենդն է»,– Sputnik Արմենիայի հետ զրույցում հայտնեցին Zakaryan ընկերությունից։
Ընկերությունը Հայաստանում չորս բրենդային խանութ ունի` մեկը Գյումրիում է՝ հենց գործարանի դիմաց, մյուս երեքը՝ Երևանում, Ապարանում և Արտաշատում։
Ի՞նչ կհագնեն հայուհիները. նոր սեզոնի նորաձև միտումները
Zakaryan ջինսերը նաև հատուկ Handmade շարք ունեն։ Գործարանում կա հատուկ բաժին, որտեղ պրոֆեսիոնալ նկարիչները ստեղծագործում են պատրաստի ջինսերի վրա։ Այդ ջինսերը հասարակներից երկու–երեք անգամ ավելի թանկ են։ Դրանք չեն կրկնում մեկը մյուսին, և հնարավորություն ընձեռում ընդամենը 25 հազար դրամով աշխարհում իր տեսակի մեջ եզակի ջինս հագնել։
