ԵՐԵՎԱՆ, 1 սեպտեմբերի - Sputnik. Աշխարհազորի ստեղծումը չի ենթադրում փողոցներում զինված անձանց առկայություն։ Այսօր լրագրողների հետ հանդիպմանը մեկնաբանելով աշխարհազորի մասին օրենքի նախագծի շուրջ առկա մտահոգությունները, նման հայտարարություն արեց ՀՀ պաշտպանության փոխնախարար Գաբրիել Բալայանը։
Նրա խոսքով` նման մեկնաբանություններով են հանդես գալիս որոշ իրավապաշտպաններ ու ռազմական մեկնաբաններ։ Բայց դա, ըստ Գաբրիելյանի, վկայում է այն մասին, որ նրանք նախագիծը չեն ընթերցել։
«Ներգրավումը տեղի է ունենալու բացառապես ռազմական գործողությունների, ռազմական անմիջական սպառնալիքի առկայության դեպքում։ Այսինքն` այդ զենքն ու սպառազինությւնը բաժանվելու է աշխարհազորում ցուցադրված քաղաքացիական անձանց միայն անմիջական վտանգի դեպքում»,– ասաց Բալայանը` հավելելով, որ իր համար հասկանալի չէ, թե որտեղից է առաջացել այն միտքը, թե փողոցներում հայտնվելու են զինված անձինք։
Փոխնախարարը նաև հիշեցրեց, որ 2016թ–ի ապրիլին Հայաստանում կազմավորվել էին կամավորական ռազմական խմբեր, որոնք, ըստ նրա, ավելի շատ խանգարում էին ԶՈՒ–ին։ Բալայանը շեշտեց, որ այդ գործընթացը պետք է լինի կազմակերպված։ Աշխարհազորում կներգրավվեն մինչև 70 տարեկան անձինք։
Աշխարհազորի ստեղծումը լայնամասշտաբ պատերազմի պատրաստվելու համա՞ր է. Տոնոյանի պատասխանը
Զորակոչվելուց հետո նրանց կտրվի զինծառայողի կարգավիճակ` դրանից բխող սոցիալական երաշխիքներով։
Գաբրիել Բալայանը նշեց, որ իրենք այս հարցով հանդիպումներ են ունեցել «Երկրապահ» կամավորական միության հետ, ու որ այդ կազմակերպությունը միանգամայն տարբերվում է աշխարհազորից։ «Երկրապարհը» հասարակական կազմակերպություն է, որը կարող է փոխլրացնել աշխարհազորին։
Փոխնախարարի խոսքով` այս հարցով քննարկումները շարունակվում են ինչպես «Երկրապահի», այնպես էլ այլ ՀԿ–ների հետ։
«Իրավիճակը տարածաշրջանում փոխվում է ու դրան պետք է արձագանքել։ Բացի այդ, կամավորականներին պետք է կազմակերպել` նրանց արդյունավետությունը բարձրացնելու համար»,– ասաց Գաբրիելյանը։
Նա նաև հստակեցրեց, որ աշխարհազորայինները կարող են ներգրավվել շփման գծի ու սահմանների վտանգավոր հատվածների պաշտպանության, հակառակորդի դիվերսիոն ու հետախուզական խմբերի դեպ պայքարում, ինչպես նաև հատուկ նշանակության օբյեկտների պաշտպանության գործում։
Հիշեցնենք` օգոստոսի 25 –ին ՀՀ ՊՆ–ը շրջանառության մեջ է դրել աշխարհազորի մասին ՀՀ օրենքի նախագիծը, որն արդեն իսկ բուռն արձագանք է ստացել հանրության շրջանում։
Երևանում աշխարհազոր կստեղծվի. ՊՆ–ն հանրային քննարկման է ներկայացրել օրենքի նախագծերը
