ՀՀ պաշտպանության նախարարությունը հանրային քննարկման է ներկայացրել օրենքի նախագծեր, որոնց համաձայն սահմանվում են Երևան քաղաքում աշխարհազորի ստեղծման և ղեկավարման, աշխարհազորայինների հավաքագրման հետ կապված հարաբերությունները:
«Հենակետ» վերլուծական կենտրոնի ղեկավար, Արցախի նախագահի անվտանգության հարցերով նախկին խորհրդական Տիգրան Աբրահամյանի դիտարկմամբ` նախաձեռնությունը շատ սպասված է, նույնիսկ ուշացած, բայց կարևոր է, որ գոնե այս փուլում այն որոշակի միս ու արյուն է ստանում։ Ըստ նրա` նախագիծը մշակումների տեղ ունի. պատահական չէ, որ ՊՆ–ն այն ներկայացրել է հանրային քննարկման, ուստի կարևոր է, որ ընդգրկի քննարկումների հնարավորինս լայն շրջանակ։
«Ընդ որում, կարևոր է ոչ միայն օպտիմալ տարբերակով նման փաստաթուղթ ունենալը, այլև աշխատող մեխանիզմներ պարունակող փաստաթուղթ ունենալը։ Լավ կլինի, եթե հանրային քննարկումները ծառայեն նաև հանրային իրազեկմանը, առավել ևս, որ աշխարհազոր ստեղծելու նախաձեռնությունը ենթադրում է կամավորության սկզբունք, հետևաբար կամավոր հիմունքներով մեծ մասնակցություն կարելի է ապահովել միայն լայն իրազեկման արշավների միջոցով»,– նշում է «Հենակետ» վերլուծական կենտրոնի ղեկավարը։
Փաշինյանը համոզված է` ՀՀ քաղաքացին այլևս երբեք թույլ չի տա պետականության կորուստ
Աբրահամյանի կարծիքով` նախաձեռնությունը բխում է ռազմաքաղաքական իրադրությունից, որ ստեղծված է մեր տարածաշրջանում, և այդ պարագայում կանոնավոր զորքերին ցանկացած դեպքում և ամենատարբեր իրավիճակներում անհրաժեշտ է լինում փոխլրացնել մարտունակ պահեստազորով, ուստի այն մոդելը, որը դեռ պետք է անցնի քննարկումների ու մշակումների փուլ, հնարավորություն կտա ոչ միայն լայնամասշտաբ ռազմական գործողությունների, այլ իրադրության սրացումների, նունիսկ քաղաքական հայտարարություններից բխող կամ դրանց հետևանքով առաջացած սպառնալիքների պարագայում ունենալ մոբիլ ստորաբաժանումներ, որոնք ոչ ամբողջական մոբիլիզացիայի պայմաններում կհայտնվեն սահմանային հատվածում, եթե առաջանա դրա անհրաժեշտությունը։
«Սրանք ըստ էության ռեզերվային ուժեր են, որոնք ամենատարբեր սցենարների պարագայում ապահովելու են Հայաստանի և Արցախի անվտանգությունը։ Մեր պահեստազորն այսօր էլ բավականին մեծ է իր թվաքանակով և անհրաժեշտություն է առաջացել ունենալ միջանկյալ մի տարբերակ, բայց դա չի նշանակում, որ պահեսատազորը, որպես այդպիսին, վերանալու է։ Չի բացառվում, որ աշխարհազորի մեջ ընդգրկվեն պահեստայինների 10-15 տոկոսը, սակայն դա կախված է նրանից, թե որ իրավիճակում ինչպիսի մոդել կընտրվի»,– նշում է «Հենակետ» վերլուծական կենտրոնի ղեկավարը։
Նրա գնահատմամբ` Պաշտպանության նախարարության նախաձեռնությունն ըստ էության միջանկյալ լուծում է, որը մեզ հնարավորություն կտա շատ ավելի կարճ ժամկետում ունենալ առավել մարտունակ պահեստազոր, մոբիլ ստորաբաժանումներ, որոնց կառավարման, իրազեկվածության, աշխատանքների կազմակերպման ու ներգրավվածության հարցերը որոշակի փուլում կլինեն ավելի հստակ։
