ԵՐԵՎԱՆ, 1 սեպտեմբերի - Sputnik. Կյանքին վտանգ սպառնացող նման թունավորում լինում է տեխնիկական ծագման` մեթիլ սպիրտի օգտագործման հետևանքով։ Sputnik Արմենիայի հետ զրույցում այսպիսի տեսակետ հայտնեց «Արմավիրի բժշկական կենտրոն» ՓԲԸ-ի տնօրենի պաշտոնակատար Հարություն Զուռնաչյանը` անդրադառնալով Արմավիրում տեղի ունեցած դեպքին, որի հետևանքով 11 մարդ է մահացել։
«Մեթիլ սպիրտն ունի ազդեցության բարձր վտանգ։ Երեկ «Արմավիրի» ԲԿ տեղափոխված երկրորդ դեպքից հետո արագ կողմնորոշվեցինք, որ «ալկոհոլային ինտոքսիկացիա» է` անհայտ ծագման ոգելից խմիչքի օգտագործման հետևանքով։ Հիվանդներին տեղափոխեցինք երևանյան ԲԿ–ներ»,–ասաց Զուռնաչյանը։
Նրա խոսքով` այս պահին «Արմենիա» հանրապետական ԲԿ տեղափոխված երկու պացիենտների վիճակը բժիշկները գնահատում են ծայրահեղ ծանր։
ՀՀ Արմավիրի մարզպետարանի առողջապահության և սոցիալական ապահովության վարչության պետ Հովհաննես Հարությունյանն էլ հայտնեց, որ մասսայական միջոցառում չի եղել, ուղղակի տարբեր խմբեր նույն մարդուց օղի են գնել։
Սննդի անվտանգության տեսչական մարմիննն իր հերթին դեպքի առնչությամբ հաղորդագրություն է տարածել` հայտնելով, որ այս պահի դրությամբ բռնագրավվել է չիրացված ոգելից խմիչքի խմբաքանակ, քայլեր են արվում նաև քաղաքացիների կողմից ձեռք բերված խմբաքանակները հայտնաբերելու և բռնագրավելու ուղղությամբ: Ըստ նախնական վարկածի և թունավորման ախտանիշների` խոսքը գնում է մեթիլ սպիրտից թունավորման մասին:
![Սննդի անվտանգության տեսչական մարմնի հրապարակած լուսանկարներից Սննդի անվտանգության տեսչական մարմնի հրապարակած լուսանկարներից - Sputnik Արմենիա](https://cdn.am.sputniknews.ru/img/07e4/09/01/24300375_0:330:1201:1084_600x0_80_0_0_a86e437f665adc394d5bfd9e23a27e4f.jpg)
![Սննդի անվտանգության տեսչական մարմնի հրապարակած լուսանկարներից Սննդի անվտանգության տեսչական մարմնի հրապարակած լուսանկարներից - Sputnik Արմենիա](https://cdn.am.sputniknews.ru/img/07e4/09/01/24300367_0:379:1201:1133_600x0_80_0_0_76a0f3afe600b0872728c0ca35c3ea6d.jpg)
![Սննդի անվտանգության տեսչական մարմնի հրապարակած լուսանկարներից Սննդի անվտանգության տեսչական մարմնի հրապարակած լուսանկարներից - Sputnik Արմենիա](https://cdn.am.sputniknews.ru/img/07e4/09/01/24300361_0:58:1200:812_600x0_80_0_0_9580daa03cba40fc9f12541d6274160d.jpg)
Հիշեցնենք, որ առողջապահության նախարարությունը հայտնել էր, որ ևս մեկ տուժած «Հերացի» թիվ 1 կլինիկական հիվանդանոցի վերակենդանացման բաժանմունքում է։
Քննչական կոմիտեն էլ տեղեկացրել էր, որ անվտանգության պահանջներին չհամապատասխանող ապրանքներ իրացնելու կասկածանքով ձերբակալվել է Արմավիր քաղաքի բնակիչ Աշոտ Լենդրուշի Հովսեփյանը՝ ծնված 1970թ.: Օպերատիվ միջոցառումներ են ձեռնարկվում՝ քաղաքացիների կողմից ձեռք բերված ևս 30 լիտր ալկոհոլային խմիչքը հայտնաբերելու, ինչպես նաև՝ բոլոր գնորդների ինքնությունը պարզելու ուղղությամբ: