ԵՐԵՎԱՆ, 25 հուլիսի – Sputnik. Մոսկվայի Հանրային պալատի փոխնախագահ, «Эхо Москвы» պարբերականի գլխավոր խմբագիր Ալեքսեյ Վենեդիկտովը դիմել է Ռուսաստանի հայ և ադրբեջանցի գործարարներին՝ կոչ անելով դադարեցնել ազգամիջյան հաշվեհարդարները:
Ռուսաստանում և այլ երկրներում բնակվող հայերի ու ադրբեջանցիների հարաբերությունները սրվել են վերջերս հայ-ադրբեջանական սահմանին տեղի ունեցած մարտերից հետո։
«Արաս Ագալարով, Արա Արբրահամյան, Գոդ Նիսանով, Սամվել Կարապետյան և մյուս տղամարդիկ։ Ժամանակն է, որ ձեր եղբայրներին կոչ անեք դադարեցնել հայ-ադրբեջանական կռիվները Մոսկվայում։ Դիմեք մարդկանց, ձեզ կլսեն»,-գրել է Վենեդիկտովը իր Telegram-ալիքում։
Նշենք, որ Ռուսաստանի հայերի միությունը, որը ղեկավարում է Արա Աբրահամյանը, վերջին օրերին պարբերաբար կոչ է անում հայրենակիցներին չտրվել սադրանքների և չմասնակցել ադրբեջանցիների հետ կռիվներին։
Հայերի և ադրբեջանցիների բախումները սպառնում են Ռուսաստանի ներքին կայունությանը․ Արեշև
Միության վերջին հայտարարության մեջ ասվում է, որ որոշ նորահայտ «հասարակական գործիչներ» խաղում են ադրբեջանցիների կազմակերպված խմբերի հարձակմանը ենթարկված իրենց հայրենակիցների զգացմունքների վրա և հանդես են գալիս սեփական երկիրն ու ժողովրդին խայտառակող ուղիղ եթերով՝ այս բարդ օրերին իրար խառնելով հասարակությանը։
Հիշեցնենք, որ հուլիսի 24-ի գիշերը Մոսկվայում ադրբեջանցիները սկսել են խմբերով հարձակվել հայերի վրա։ Տեսանյութերից մեկում մի խումբ ադրբեջանցիներ ծեծում էին հայկական համարանիշով մեքենայում գտնվող տղամարդուն, մյուսում` ոտքերով հարվածում տարեց տղամարդուն ու հարցնում` ո՞ւմն է Ղարաբաղը։
Իրավիճակն ինչ–որ առումով պայթյունավտանգ է. Տողանյանը թախանձագին խնդրանքով դիմել է հայերին
Տեղեկություն կա, որ հայերից մեկն էլ դանակահարվել է։
«Ադրբեջանցիների միությունն» իր հերթին հայտարարել է, որ հայերը հարձակվել են Մոսկվայի «1001 գիշեր» ռեստորանի վրա, ծեծել են մի մրգավաճառի։
