ԵՐԵՎԱՆ, 20 հուլիսի –Sputnik. Իրանում մահապատժի են ենթարկել Մահմուդ Մուսավի Մաջդին` մեղադրելով Կենտրոնական հետախուզական վարչության և իսրայելական «Մոսադ» արտաքին հետախուզության օգտին լրտեսելու մեջ, հայտնում է Fars լրատվական գործակալությունը։
Մահմուդ Մուսավի Մաջդին կալանավորել էին 2018 թվականի հոկտեմբերին և 2019 թվականի օգոստոսին իրանական դատարանի կողմից դատապարտել բարձրագույն պատժի։ Նրա մեղադրական եզրակացության կետերից մեկն ԱՄՆ ԶՈւ ԱԹՍ–ի հարվածի հետևանքով այս տարեսկզբին սպանված իրանցի զորահրամանատար Ղասեմ Սոլեյմանիի և ԻԻՀ–ի այլ բարձրաստիճան զինվորականների տեղաշարժի մասին տեղեկատվության տրամադրումն էր։
Մանկուց ընտանիքով Իրանը լքած և Սիրիայում մեծացած Մուսավի Մաջդը երբեք Իսլամական հեղափոխության պահապանների կորպուսի անդամ չի եղել, սակայն նրան հաջողվել է թարգմանչի անվան տակ ներթափանցել այդ կազմակերպության մի շարք զգայուն ոլորտներ», պարզաբանում է Fars–ը։
Լավ անգլերեն և արաբերեն իմացության շնորհիվ նրան որպես թարգմանիչ աշխատանքի էին ընդունել Իրանի հետ համագործակցող սիրիական ընկերություններից մեկում։
Նոր հարվածներ. ո՞վ է փորձում ԱՄՆ–ին դուրս մղել Մերձավոր Արևելքից
Tasnim լրատվական գործակալությունն ավելի վաղ հայտնել էր, որ Մուսավի Մաջդը լիբանանյան «Հեզբոլայի» օպերատիվ ծառայողների կողմից 2018 թվականին Սիրիայում կալանավորվել էր և փոխանցվել Իրանին։ Իրանական ԶԼՄ–ների տվյալներով` ԿՀՎ–ից և «Մոսադից» նա ամսական 5000 դոլար էր ստանում Սիրիայում իրանական ուժերի մասին տեղեկության դիմաց։
