ԵՐԵՎԱՆ, 15 հուլիսի – Sputnik. Իսրայելական Hermes 900 արտադրության ադրբեջանական անօդաչու սարքը խոցվել է «ՕՍԱ-ԱԿՄ» համակարգից․ տեղեկությունը հաստատեց ՀՀ պաշտպանության նախարարության ներկայացուցիչ Արծրուն Հովհաննիսյանը այսօր Տավուշի ճգնաժամային տեղեկատվական կենտրոնում կայացած ճեպազրույցի ժամանակ:
«Մեր ռազմարդյունաբերական համալիրը դեռ մի քանի տարի առաջ է յուրացրել«ՕՍԱ-ԱԿՄ»-ի արդիականացման տեխնոլոգիաները», - ասաց Հովհաննիսյանը:
Վերջին տարիներով, ըստ նրա, ադրբեջանական անօդաչու թռչող սարքերի խոցման լավագույն գործիքը եղել են «Օսա-ԱԿ» և «ՕՍԱ-ԱԿՄ» ՀՕՊ համալիրները:
Պատասխանելով Sputnik Արմենիայի հարցին, թե երեկ երեկոյան ի՞նչ ադրբեջանական անօդաչու թռչող սարքեր են խոցվել, Հովհաննիսյանը նշեց`քանի որ դրանք ընկել են միջդիրքային տարածքում, այդ պատճառով դեռ հստակ նույնականացնել չի հաջողվել:
Նշենք, որ ՀՀ զինված ուժերը երեկ` հուլիսի 14–ին, խոցել են ադրբեջանական Elbit Hermes 900-ը մարտավարական խոշոր անօդաչու թռչող սարք, որն արժե ավելի քան 30 մլն ԱՄՆ դոլար, ընդ որում՝ այս տիպի ԱԹՍ-ի աշխարհում առաջին հայտնի խոցումն է: Հայկական զինված ուժերը վերջին օրերի ընթացքում հակառակորդի 10-ից ավելի ԱԹՍ են խոցել, այդ թվում` կամիկաձե։
ՀՀ զինված ուժերի կողմից խոցված Elbit Hermes 900 ԱԹՍ-ն 30 մլն ԱՄՆ դոլար արժեր
Հիշեցնենք` հուլիսի 12–ից սկսած իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են կատարել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո ադրբեջանական ԶՈՒ-ն պարբերաբար կրակահերթ է իրականացնում ինչպես հայ դիրքապահների, այնպես էլ գյուղերի ուղղությամբ։
Պաշտոնական տվյալներով՝ Ադրբեջանն ունի 11 զոհ, իսկ հայկական կողմը` 4 զոհ և 10 վիրավոր։
