ԵՐԵՎԱՆ, 13 հուլիսի — Sputnik. ՀՀ Մարդու իրավունքների պաշտպան Արման Թաթոյանը հրավիրում է մարդու իրավունքների միջազգային կազմակերպությունների ուշադրությունը, քանի որ ադրբեջանական զինուժը գնդակոծություն է իրականացնում Տավուշի մարզի խաղաղ բնակավայրերի անմիջական հարևանությամբ։ Թաթոյանը նման գրառում է արել Facebook սոցցանցի իր էջում` անդրադառնալով ադրբեջանական ԶՈՒ–ի գործողություններին։
ՀՀ ԱԳՆ–ն Տավուշում հրադադարի խախտումների հետ կապված հայտարարություն է արել
Հայտնել էինք, որ երեկվանից իրավիճակը լարվել է Տավուշի սահմանին. հակառակորդը կրակում է հայկական դիրքերի ուղղությամբ։
«Մարդու իրավունքների պաշտպանը, լինելով մարդու իրավունքների ազգային անկախ հաստատություն և առաջնորդվելով բացառապես իրավապաշտպան սկզբունքներով, խստորեն դատապարտում է գնդակոծությունը։ ՄԻՊ–ը դատապարտում է, քանի որ որ այն իրականացվում է ՀՀ խաղաղ բնակավայրերի անմիջական հարևանությամբ, և այդ բնակավայրերի բնակիչներին, նրանց առողջությանն ու կյանքին, սեփականությանը վնաս պատճառելով իրական վտանգ է պարունակում»,–գրել է Թաթոյանը։
Նա նաև հավելել է, որ այս երևույթն առավել ևս դատապարտելի է նոր տեսակի կորոնավիրուսի (COVID-19) համաճարակի պայմաններում: Թաթոյանը տեղեկացնում է, որ նախաձեռնել է թիրախային դիտարկում, որի արդյունքները սահմանված կարգով կամփոփվեն ու կուղարկվեն միջազգային կառույցներին:
Հիշեցնենք`երեկ` հուլիսի 12–ին, ժամը 12:30-ի սահմաններում, Ադրբեջանի զինված ուժերի զինծառայողները УАЗ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են կատարել: Հայկական կողմի նախազգուշացումից հետո Ադրբեջանի զինծառայողները, թողնելով УАЗ մակնիշի ավտոմեքենան, վերադարձել են իրենց դիրք: Ժամը 13:45-ին Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը, կիրառելով հրետանային կրակ, սակայն ճնշվել են հայկական կողմից և կորուստներ տալով` հետ շպրտվել:
Ավելի ուշ հայտնի դարձավ, որ ադրբեջանական կողմը վերսկսել է Տավուշի դիրքերի ուղղությամբ հրետակոծությունը:
ՀՀ ՊՆ խոսնակ Շուշան Ստեփանյանն այսօր վաղ առավոտյան հայտնեց, որ երկու-երեք ժամվա դադարից հետո առավոտյան հակառակորդը վերսկսել է սադրիչ գործողությունները՝ շարունակելով հրետակոծել հայկական դիրքերի ուղղությամբ։
Տոնոյանը զգուշացրել է` ինչ կլինի, եթե հակառակորդը չդադարեցնի կրակը
