ԵՐԵՎԱՆ, 2 հուլիսի - Sputnik. Բալի մեկ հատիկը 90 կալորիա է պարունակում, ինչպես նաև բավարար չափով բջջանյութի, սպիտակուցի և А ու С վիտամինների պաշար։ Միչիգանի համալսարանում 18-25 տարեկան առողջ մարդկանց վրա անցկացրած կլինիկական ուսումնասիրությունն առաջին անգամ ցույց է տվել, որ բալի հակաօքսիդանտները ընկնում են մարդու արյան մեջ և 12 ժամով բարձրացնում ողջ օրգանիզմի հակաօքսիդանտային ակտիվությունը։
Ձեզ ենք ներկայացնում 4 ծանրակշիռ պատճառ սեզոնին այս պտղի կողքով անտարբեր չանցնելու համար։
Կարգավորում է քունը
Դիետոլոգ և 1:1:1 հայտնի սննդային համակարգի հեղինակ Ռանիա Բատայնեն պնդում է, որ «հակաօքսիդանտներից բացի բալը մելատոնինի (հորմոն, որը կարգավորում է քնի և արթուն վիճակի ցիկլերը) միակ բնական աղբյուրն է»։ Քնելուց մեկ ժամ առաջ մի քանի հատի օգտագործումը կարող է էապես լավացնել քնի որակը։
Օգնում է բորբոքումների ժամանակ
Ընդունված է, որ բոլոր կարմիր գույն ունեցող մրգերն ու բանջարեղենները ագրեսիվ են և ուժեղացնում են բորբոքային գործընթացներն օրգանիզմում։ Սակայն բալի դեպքում ամեն ինչ այլ է։ Բոստոնի համալսարանի գիտնականները պարզել են, որ նրանց մոտ, ովքեր ընդամենը երկու օրվա ընթացքում ակտիվ բալ են օգտագործել, 35%–ով նվազել է արթրիտի և օստեոարթրիտի նոպաների վտանգը, ի տարբերություն նրանց, ովքեր բալ չեն կերել։ Սա փաստում է այն մասին, որ բալը ոչ թե խթանում, այլ նվազեցնում է բորբոքումները։
Լավացնում է հիշողությունը
Բալը անտոցիանի (նյութ, որը ուժեղացնում է հիշողությունը) լավ աղբյուր է։ Բոստոնի Տաֆթսա համալսարանի սննդի և ծերության խնդիրների ուսումնասիրման կենտրոնը նման արդյունքներ է հրապարակել առնետների վրա մի շարք փորձարկումներից հետո։ Կենդանիների հիշողությունն ու շարժողական ֆունկցիան էապես բարելավվել են սննդակարգում անտոցիանի ավելացումից հետո։
Օգնում է նվազեցնել սրտային հիվանդությունների վտանգը
Թթվահամ պտուղները նպաստում են նաև սիրտ-անոթային աշխատանքի կարգավորմանը` մետաբոլիկ համախտանիշով պացիենտի մոտ կարգավորելով գլյուկոզայի մակարդակը։ Science Daily պարբերականը հայտնում է՝ Միչիգանի համալսարանի հետազոտական լաբորատորիայում կարծում են, որ այս պտուղը կարող է նվազեցնել գլխուղեղի կաթվածի վտանգը, նույնիսկ եթե այն օգտագործվում է նշանակված դեղամիջոցների հետ։
Գիտնականները չափել են ինսուլտին հակված առնետների արյան ճնշումը, ինչպես նաև նրանց հավասարակշռությունն ու կոորդինացիան տարբեր ֆիզիկական թեստերի օգնությամբ: Արդյունքները հրապարակվել են 2013-ին. բալի «վրա նստած» կենդանիների մոտ բարելավվել է կոորդինացիան և նվազել է արյան ճնշումը:
Վնասակարությունն ու հակացուցումները
Անկախ ամեն ինչից, բալն ամեն դեպքում նաև հակացուցումներ ունի, որոնք սահմանափակում են դրա օգտագործումը հետևյալ խնդիրներն ունեցող մարդկանց համար․
– գաստրիտի և խոցի սրացում
– բարձր թթվայնություն
- ցածր ճնշում
- թոքերի սուր բորբոքային հիվանդություններ
–անհատական անընդունելիություն
- ատամի էմալի շերտի քայքայման դեպքում
Սակայն պետք է նշել, որ բալը քիչ քանակությամբ կարելի է օգտագործել նաև այս հիվանդությունների դեպքում։ Պարզապես պետք է խորհրդակցել մասնագետի հետ և գնահատել բոլոր ռիսկերը։ Դրանից հետո կարելի է վայելել սիրելի պտուղը` չմտահոգվելով առողջության համար, բայց և չչարաշահելով այն։
Ինչպես ընտրել բալ
Որպեսզի այս պտուղն առողջության համար իսկապես օգտակար լինի, պետք է այն ճիշտ ընտրել, եթե, իհարկե, չունեք սեփական այգի։ Դա բոլորովին դժվար չէ։ Պարզապես պետք է տիրապետել որոշակի կանոնների.
Պտուղը պետք է հյութալի վառ կարմիր գույն ունենա։ Որքան այն մուգ է, այնքան ավելի քաղցր է։
Ավելի լավ է ընտրել այն մրգերը, որոնց պտղակոթը պահպանվել է, քանի որ այդ դեպքում միրգն ավելի երկար է մնում։ Կոթը պետք է կանաչ լինի։
Բալը պետք է բավական ամուր լինի։ Մրգի վրա փոսիկներ չպետք է լինեն։
Պետք է հետևել նաև, որ բալի գլխիկների վրա բորբոսի հետքեր չլինեն։
Հոդվածը պատրաստվել է ELLE ամսագրի և Polzavred կայքի հրապարակումների հիման վրա։
