ԵՐԵՎԱՆ, 2 հուլիսի - Sputnik. Բնապահպանության և ընդերքի տեսչական մարմինը տեղեկացնում է, որ կառույցի աշխատակիցները սոցցանցերում աղտոտված արագիլների «հետքերով» են գնացել և աղտոտված արագիլներ չեն հայտնաբերվել։
Կենդանաբան Վասիլ Անանյանը Facebook-ում հրապարակել էր աղտոտված արագիլների նկարներ` հայտնելով, որ Հայաստանի արագիլները դարձյալ աղտոտվել են:
«Տեսչական մարմնի Արմավիրի տարածքային բաժնի աշխատակիցները հեռախոսակապ են հաստատել գրառումներ կատարած օգտատերերի հետ՝ կեղտոտված արագիլների վայրը ճշտելու նպատակով, սակայն նշված տարածքներում աղտոտված արագիլներ չեն հայտնաբերվել»,– նշված է հաղորդագրության մեջ։
Տեսչական մարմնի մասնագետները պարբերաբար շրջայցեր են կատարում Արմավիրի Երասխահուն, Զարթոնք, Առատաշեն, Խորունք, Գրիբոյեդով, Ակնաշեն, Եղեգնուտ, Արևիկ և մի շարք այլ համայնքներ` աղտոտված արագիլներ հայտնաբերելու համար:
Աղտոտված արագիլների խնդիրը դեռ լուծված չէ, իսկ նրանց կեղտոտվելը մեծ խնդրի ահազանգն է
Հիշեցնենք, որ ըստ կենդանաբան Վասիլ Անանյանի` աղտոտված արագիլները Երասխահունում էին։
2019 թ-ի հուլիսին սոցիալական կայքերում տեղեկություններ տարածվեցին, որ Արարատի մարզի Հովտաշեն համայնքի տարածքում ապրող արագիլներն աղտոտված են ու չեն կարողանում թռչել։
Որոշ ենթադրությունների համաձայն` արագիլներն աղտոտվել էին Հրազդան գետը լցված արտադրական թափոններից։ Հարցի վերջնական պատասխանի համար գետի ջրից ու կենդանիների փետուրներից լաբորատոր փորձաքննություն իրականացվեց։
Առաջին ահազանգից շուրջ 2 շաբաթ անց՝ օգոստոսի 2-ին, Բնապահպանության և ընդերքի տեսչական մարմինը հայտնեց, որ Արարատի մարզի արագիլների աղտոտման հավանական աղբյուրը Հրազդան գետի աղտոտված հատվածն է: Իսկ գետն աղտոտել էին մարզի ձկնաբուծարանները:
Հանցագործները հայտնաբերված չեն, իսկ պատկան մարմինները խիստ հապաղում են. Սիլվա Ադամյան
