ԵՐԵՎԱՆ, 28 հունիսի - Sputnik. Միջազգայնագետ դառնալու երազանքը Լիլիթ Մանուչարյանին ստիպել է վերջին շրջանում հնարավորինս նվազեցնել շփումները. տնից փորձում է դուրս չգալ, պահպանում է անվտանգության բոլոր նորմերը։
«Այն, որ կարող ես թեկուզ մրսել, տաքություն ունենալ և դրա հետևանքով մեկ տարի կորցնել` վախենալու է։ Միտքը, որ ընդունելության համար երկրորդ հնարավորություն չի տրվելու, պարապելու ընթացքում մի քիչ խանգարում է»,–ասաց Լիլիթը` հավելելով, որ «Պատմություն» առարկայից է քննություն հանձնելու։
Կորոնավիրուսային իրավիճակից ելնելով` այս տարի բուհ ընդունվելու համար քննությունների երկրորդ փուլ նախատեսված չէ, այսինքն` դիմորդները մեկ հնարավորություն ունեն միայն։ Քննության մտնելուց առաջ բոլորին ջերմաչափելու են` ջերմություն ունեցողներին թույլ չեն տալու մասնակցել քննությանը։
Գնահատման և թեստավորման կենտրոնի մամուլի խոսնակ Խաչանուշ Գրիգորյանը Sputnik Արմենիայի հետ զրույցում հայտնեց` բոլոր նրանք, ովքեր ինչ-որ հիվանդության պատճառով կամ առանց դրա ունենում են մի փոքր ավելի բարձր ջերմություն, պոլիկլինիկաներից պետք է տեղեկանք ունենան։
Նա ասաց նաև, որ նախքան քննասենյակ մտնելը դիմորդներին դիմակ, ձեռնոց և գրիչ կտրամադրվի, իսկ ԱԻՆ–ը յուրաքանչյուր քննությունից առաջ կախտահանի քննական կենտրոնները։ Այս տարի 30 տոկոսով ավելացել է նաև դրանց թիվը` 47 քննական կենտրոն կլինի, որպեսզի դիմորդների միջև սոցիալական հեռավորությունը հնարավոր լինի պահպանել։ Նախկին 250–ի փոխարեն էլ մեկ քննական կենտրոնում այժմ 100-120 դիմորդ կլինի։
Աշակերտներին նման «լավություն» պետք չէ. քննությունները հանելն անարդարություն է. փորձագետ
«Ինչ վերաբերում է քննության ժամանակին, ապա դիմորդները կարող են չանհանգստանալ, քանի որ քննության մեկնարկը հայտարարվելու է, երբ թեստերը, պատասխանի ձևաթուղթը կբաժանվեն։ Ջերմաչափել, դիմակ տրամադրելը նախապատրաստական փուլ կդիտարկվի»,–ասաց Գրիգորյանը։
Քննական կենտրոններում տեսախցիկներ լինելու են, և ծնողները կարողանալու են ինչպես միշտ` դրսում հետևել քննության ընթացքին, սակայն Գրիգորյանը ծնողներին հորդորեց մեծ խմբերով չգնալ քննություններին։
Կրթության փորձագետ Ատոմ Մխիթարյանը Sputnik Արմենիայի հետ զրույցում նշեց, որ շատ անարդարացի է մեկ փուլով քննություն անցկացնելը, քանի որ դիմորդին պետք է առնվազն ևս մեկ անգամ հնարավորություն տրվի։
«Սա շատ սխալ որոշում է, և ես հայտնում եմ նաև դիմորդների կարծիքը։ Այսինքն, եթե մեկի մոտ հարբուխ լինի` վերջ, մեկ տարի կկորցնի։ Մեկ փուլով քննություն անցկացնելը կհանգեցնի այն բանին, որ տասնյակ կամ հարյուրավոր դիմորդներից կարող ենք զրկվել առհասարակ, քանի որ ոչ ոք չի կարող ասել` այս տարի բուհ չընդունված երիտասարդը վստահաբար հաջորդ տարի նորից կուզենա՞ ուժերը փորձել»,–ասաց Մխիթարյանը։
Նրա խոսքով` որոշներն այդ ընթացքում աշխատանքի հարց կփորձեն լուծել և դեռ հարց է նրանց` հետագայում կրթություն ստանալը։ Կրթության փորձագետը նշեց, որ այս որոշումը գալիս է մեկ անգամ ևս հաստատելու կարծիքը, որ կրթության ոլորտում որոշումները կայացվում են` հաշվի չառնելով հանգամանքները, որոնք հետագայում կարող են բերել ավելի մեծ բարդությունների։
Կարեն Հովհաննիսյանը, որի աղջիկն այս տարի պետք է փորձի արևելագիտության ֆակուլտետ ընդունվել, նշում է, որ դստեր հետ շփումները սահմանափակել են անգամ տանը։
«Ես աշխատանքի եմ գնում–գալիս, կինս` նույնպես։ Գործից գալիս և աղջկաս խնդրում ենք սենյակից դուրս չգալ` եթե մենք կորոնավիրուսով կամ գրիպով վարակված լինենք, նրան էլ ենք փոխանցելու։ Կինս ծածուկ լոգասենյակն է ամեն օր ախտահանում, մեր սպասքն էլ առանձնացրել ենք։ Կարծում եմ` ավելորդ լարվածություն են մտցրել դիմորդների շրջանում քննության երկրորդ փուլը հանելով»,–ասաց Հովհաննիսյանը։
Հիշեցնենք, որ Հայաստանում այս տարվա միասնական քննությունները կմեկնարկեն հուլիսի 2-ին և կավարտվեն հուլիսի 8-ին։ Այս տարի, կորոնավիրուսային իրավիճակով պայմանավորված, դիմորդները միայն մեկ քննություն կհանձնեն բուհ ընդունվելու համար։
Արայիկ Հարությունյանը դիմորդների ծնողներին խնդրում է քննական կենտրոններ չգնալ
