ԵՐԵՎԱՆ, 25 հունիսի – Sputnik. ՀՀ վերաքննիչ քրեական դատարանը ԱԺ նախկին պատգամավոր, Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանի նկատմամբ որպես խափանման միջոց կալանավորումն ընտրելու մասին որոշումը թողել է անփոփոխ։
ՀՀ քննչական կոմիտեն տեղեկացնում է, որ հետախուզման մեջ գտնվող Հայրապետյանի համար որպես խափանման միջոց կշարունակի ընտրված մնալ կալանավորումը։
«ՀՀ վերաքննիչ քրեական դատարանը անփոփոխ է թողել Հայրապետյանի նկատմամբ որպես խափանման միջոց կալանավորումն ընտրելու մասին Երևանի ընդհանուր իրավասության դատարանի որոշումը, որը բողոքարկվել էր»,–նշված է ՔԿ հաղորդագրության մեջ։
Նշենք, որ Ռուբեն Հայրապետյանը որպես մեղադրյալ է ներգրավել ՀՀ քրեական օրենսգրքի 119-րդ հոդվածի 2-րդ մասի 3-րդ, 5-րդ կետով (ֆիզիկական ուժեղ ցավ կամ հոգեկան տառապանք պատճառելը), 133-րդ հոդվածի 2-րդ մասի 1-ին, 2-րդ, 7-րդ կետերով (մի խումբ անձանց կողմից շահադիտական դրդումներով մարդուն առևանգելը) և 322-րդ հոդվածի 2-րդ մասով (ինքնիրավչություն):
Նրան մեղադրանք է առաջադրվել «Հարսնաքար» համալիրի գործադիր մարմնի ղեկավարի նկատմամբ առերևույթ կատարված ինքնիրավչության, նրան ազատությունից ապօրինի զրկելու, ֆիզիկական ուժեղ ցավ, հոգեկան ուժեղ տառապանք պատճառելու դեպքերի առթիվ քննվող քրեական գործով: Հայրապետյանը հետախուզման մեջ է։
Ռուբեն Հայրապետյանը Մոսկվայում է․ վարույթն իրականացնող մարմինը գիտի նրա հասցեն
Նույն մեղադրանքները ներկայացվել են նրա որդուն՝ Ռաֆիկ Հայրապետյանին, որին կալանավորելու միջնորդությունը մերժվել է, նա ազատության մեջ է։
