ԵՐԵՎԱՆ, 25 հունիսի – Sputnik. ՀՀ արդարադատության նախարար Ռուստամ Բադասյանն օրվա ավարտին լավ լուր է հայտնել` երեխաների ծնունդների տեղում գրանցման գործընթացին կմիանան ևս չորս բուժկենտրոններ։
«Հիշո՞ւմ եք, որ այս տարվա մարտի ութին ծրագիր մեկնարկեցինք և Երևանում ամենամեծ թվով ծննդօգնություն իրականացնող երեք բժշկական կազմակերպություններում երեխաների ծնունդները սկսեցինք գրանցել տեղում: Այսօր արդեն այդ երեք ԲԿ-ներին միացել են ևս չորսը՝ «Սուրբ Գրիգոր Լուսավորիչ», «Գրիգոր Նարեկացի», «Շենգավիթ» և «Աստղիկ» բժշկական կենտրոնները»,–Facebook սոցցանցի իր էջում գրել է Բադասյանը։
Նա հայտնել է, որ այսպիսով, երեխաների ծնունդները Երևանի յոթ բժշկական հաստատություններում կգրանցվեն տեղում և կկատարվեն դրանից բխող օրենսդրությամբ նախատեսված այլ գործառույթներ: Մասնավորապես, երեխայի ծննդի պետական գրանցում, երեխայի նկատմամբ հայրության ճանաչման և ամուսնության պետական գրանցում:
Նախարարի խոսքով` ծրագիրը կրելու է շարունակական բնույթ և փուլ առ փուլ տարածվելու է Հանրապետության տարածքում ծննդօգնություն տրամադրող բոլոր բժշկական կազմակերպություններում:
Բոլորս՝ երեխա ունենալու. կառավարությունը ընտանիքներին կօգնի բնակարան ձեռք բերել
Հիշեցնենք, որ ծրագրի առաջին փուլին միացած բժշկական կազմակերպություններն էին՝ Էրեբունի բժշկական կենտրոնը (ծննդատուն), Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտն ու Մոր և մանկան առողջության պահպանման գիտահետազոտական կենտրոնը:
