ԵՐԵՎԱՆ, 21 հունիսի - Sputnik. «Բարգավաճ Հայաստան» կուսակցության առաջնորդ Գագիկ Ծառուկյանը ժամանեց Երևանի ընդհանուր իրավասության դատարանի Շենգավիթի նստավայր, որտեղ այսօր դատավորը պետք է հրապարակի կալանքի հարցի վերաբերյալ որոշումը։ Մինչ դատարան մտնելը Ծառուկյանը լրագրողների հետ զրույցում ասաց, որ մինչ այսօր իր դեմ մեղադրանքը ոչ մի կերպ չի հիմնավորվել։ Կրկնեց, որ սա քաղաքական պատվեր է։
«Ես և՛ գործընկեր էի, և՛ հուշագիր էի ստորագրում, և՛ սեփականատեր էի, որ գնում էին, նայում էին, թե ինչ աշխատանք է կատարված, որ կարողանամ իմ երկիրը լավ ներկայացնեմ։ Ինչ արել եմ, արել եմ իմ երկրի պատվի համար, ժողովրդի համար, ապագայի համար։ Ժողովրդին դնում են թյուրիմացության մեջ, անընդհատ հների հետ են կապում։ Մուկուչյանն ո՞վ է եղել, որ դեռ կա. առաջին ընտրակեղծարարը, որ ասում էին ընտրությունների համար։ Ո՞նց է, որ հիմա Մուկուչյանը կա»,- ասաց Ծառուկյանը, իսկ ԱԺ պատգամավոր Նաիրա Զոհրաբյանն էլ հավելեց՝ «որովհետև իրենց դեռ պետք է»։
Գագիկ Ծառուկյանը նշեց, որ միշտ ցանկացել է, որ հեղափոխությունը հզորանա։ Հունիսի 5-ին իր հայտարարությամբ ընդամենը ներկայացրել է երկրի տնտեսական, սոցիալական, քաղաքական իրավիճակը համավարակի հետ կապված։
Ծառուկյանը նշեց, որ տարբեր ուժերի հետ քննարկումներ են արվում։ Նա ասաց, որ քննարկում է եղել Դաշնակցության հետ։ Ինչ վերաբերում է՝ Ռոբերտ Քոչարյանի հետ համագործակցության հարցին, Ծառուկյանը նշեց, որ Քոչարյանն ինքը պետք է որոշի՝ ցանկանում է քաղաքականության մեջ մտնել, թե ոչ։
Լրագրողի այն հարցին, թե եթե դատարանն այսօր բավարարի ԱԱԾ միջնորդությունը, ինչ կանի ինքը, Ծառուկյանը նշեց, որ ժողովուրդն ու իր թիմը պետք է իրականությունը ներկայացնեն։ Նա ընդգծեց՝ պետք է ազգովին միավորվել այս վիճակից դուրս գալու համար։
Ինչ կլինի մեր մարզիկների հետ, եթե Ծառուկյանը չգլխավորի ՀԱՕԿ-ը. սպորտը և քաղաքականությունը
Հիշեցնենք` ԱԱԾ-ն հունիսի 14-ին խուզարկություն էր իրականացրել Գագիկ Ծառուկյանի առանձնատանը: Նրա դեմ 3 քրեական գործ է հարուցվել։ Առաջին քրեական գործը վերաբերում է «Շանգրի Լա» և «Օնիրա Քլաբ» խաղատներին, որի համաձայն` դրանց ապօրինի ձեռնարկատիրական գործունեության հետևանքով պետությանը հասցվել է շուրջ 30 մլրդ դրամի վնաս: Երկրորդ քրգործը վերաբերում է 2017թ-ի խորհրդարանական ընտրություններին: Ըստ գործի նյութերի` ԲՀԿ-ն հարյուր հազարների ընտրակաշառք է բաժանել:
Իսկ երրորդ քրեական գործը վերաբերում է Կոտայքի Առինջ համայնքում Ծառուկյանին պատկանող «Նյու» ընկերությանն օտարված հողատարածքին: Առինջի գյուղապետի ու ավագանու անդամների անօրինական որոշումների արդյունքում, ըստ գործի, համայնքին պատճառվել է շուրջ 400 մլն դրամի վնաս: Երեք քրեական գործերով նախաքննությունը շարունակվում է:
Սա շինծու գործ է. Գագիկ Ծառուկյանը դուրս եկավ դատարանից
Հունիսի 16-ին ԱԱԾ-ն հանդես եկավ նաև չորրորդ քրեական գործի մասին հայտարարությամբ, որը վերաբերում է արդեն 2017թ-ի Երևանի ավագանու ընտրություններում ԲՀԿ-ի կատարած ընտրախախտումներին:
Նույն օրը ԱԺ–ն որոշեց Գագիկ Ծառուկյանին զրկել անձեռնմխելիությունից և թույլ տալ, որ նրա նկատմամբ քրեական հետապնդում սկսվի։
