ԵՐԵՎԱՆ, 19 հունիսի – Sputnik. «Հերացի» թիվ 1 համալսարանական հիվանդանոցի տնօրեն Արեն Բաբլումյանը վարակվել է կորոնավիրուսով։ Տեղեկությունը Sputnik Արմենիային հայտնեց ԵՊԲՀ աշխատակազմի ղեկավար Շուշան Դանիելյանը` նշելով, որ տնօրենն ու ևս 19 աշխատակից այժմ մեկուսացել են։
«Տնօրենի մոտ երեկ է հաստատվել վիրուսը, վիճակը նորմալ է։ Երբ երկրորդ անգամ թեստի պատասխանը բացասական լինի, այդ ժամանակ կվերադառնա աշխատանքի»,– ասաց նա։
Դանիելյանի խոսքով` մինչ օրս հիվանդանոցում 90 մարդ է վարակվել կորոնավիրուսով, վարակվածները եղել են տարբեր բաժինների աշխատակիցներ, նրանցից 70-ն արդեն առողջացել են։
Այդ հիվանդանոցում մինչ այժմ մոտ 700 նմուշառում է իրականացվել։ Եղել են դեպքեր, երբ վարակակիրը անգամ 9 օր գտնվել է այդ բուժհաստատությունում` չնայած այն Covid բուժման կենտրոն չէ։
Հունիսի 19-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 19157 դեպք, 8266 մարդ արդեն առողջացել են, 319-ը` մահացել: Կորոնավիրուսային հիվանդությամբ այս պահին փաստացի բուժում է ստանում 10462 պացիենտ: Ընդհանուր առմամբ կատարվել է 91943 թեստավորում: Վերջին մեկ օրում 10 մարդ է մահացել կորոնավիրուսից։
«Մեղավորները կստանան արժանի պատիժը». Գյումրիում մահացած կնոջ հարազատները բողոքում են

