ԵՐԵՎԱՆ, 18 հունիսի - Sputnik. «Բարգավաճ Հայաստան» կուսակցության նախագահ Գագիկ Ծառուկյանի կալանավորման հարցը դատարանը կշարունակի քննարկել վաղը առավոտյան՝ 10:30։
«Քանի օր է քննիչները զբաղվում են, քանի մարդ է զբաղվում, մեծ տեռոր են բացահայտում, բայց ոչ մի ապացույց չկա, ոչ մի փաստ չկա իմ մասին։ Պետությունը անդունդի մեջ է հայտնվել, ժողովուրդը սովի ու գործազրկության մեջ է, ոչ մի խոստում չեն պահել», - դատարանից դուրս գալուց հետո լրագրողների հետ զրույցում ասաց նա։
Ծառուկյանի պաշտպան Երեմ Սարգսյանն էլ լրագրողներին ասաց, որ ինքը դատարանին հայտնել է՝ քրեական դատավարությունը կատարվում է խախտումներով։
«Ներկայացրել ենք փաստարկներ, որ գործը հարուցված է միայն քաղաքական դրդապատճառներով։ Այս փաստաթղթերը հայտնաբերվել են փետրվարին, սակայն դրանք վերհիշել են միայն հունիսի 5-ին Գագիկ Ծառուկյանի արված հայտարարությունից հետո։ Ստացվում է, որ այդ փաստաթուղթը փետրվարին հանցագործության հիմք չէր, այսօր հիմք է»,- պարզաբանեց Սարգսյանը։
Ծառուկյանի պաշտպան Երեմ Սարգսյանը պնդեց՝ իր պաշտպանյալը չի ընդունում ընտրակաշառքի մասին մեղադրանքները։
Եվրոպական պահպանողականների և ռեֆորմիստների դաշինքը մտահոգ է Ծառուկյանի գործով
«Ինչ-որ թղթեր են, որոնց վրա գրված է՝ Ծառուկյանի հորդորով այսինչին տալ այսքան գումար։ Նախ՝ պետք է հասկանալ՝ ինչ Ծառուկյանի մասին է խոսքը, հետո՝ դա հստակ ապացույց չէ, որ կոնկրետ Գագիկ Ծառուկյանը կաշառք է տվել։ Դուք էլ գիտեք, որ ցանկացած կուսակցություն նախընտրական շրջանում գումարի ֆոնդ է ունենում։ Իրենք ասում են՝ իքս վայրում, ասենք՝ Վարդենիսում, ինչ-որ ակտիվիստ գումար է ստացել, եկեք Ծառուկյանին կալանավորենք», - ասաց պաշտպանը։
Նշենք, որ ԲՀԿ–ական պատգամավորները մինչը իրենց առաջնորդի դուրս գալը նրան սպասում էին դատարանի բակում. տարածքում մեծ թվով ոստիկաններ կան։
Հիշեցնենք` ԱԱԾ-ն հունիսի 14-ին խուզարկություն էր իրականացրել Գագիկ Ծառուկյանի առանձնատանը: Նրա դեմ 3 քրեական գործ է հարուցվել։ Առաջին քրեական գործը վերաբերում է «Շանգրի Լա» և «Օնիրա Քլաբ» խաղատներին, որի համաձայն` դրանց ապօրինի ձեռնարկատիրական գործունեության հետևանքով պետությանը հասցվել է շուրջ 30 մլրդ դրամի վնաս: Երկրորդ քրգործը վերաբերում է 2017թ-ի խորհրդարանական ընտրություններին: Ըստ գործի նյութերի` ԲՀԿ-ն հարյուր հազարների ընտրակաշառք է բաժանել:
Իսկ երրորդ քրեական գործը վերաբերում է Կոտայքի Առինջ համայնքում Ծառուկյանին պատկանող «Նյու» ընկերությանն օտարված հողատարածքին: Առինջի գյուղապետի ու ավագանու անդամների անօրինական որոշումների արդյունքում, ըստ գործի, համայնքին պատճառվել է շուրջ 400 մլն դրամի վնաս: Երեք քրեական գործերով նախաքննությունը շարունակվում է:
«Ասել, որ Գագիկ Ծառուկյանի դեմ իրականացվում է քաղաքական ռեպրեսիա, տեղին չէ». Մարգարյան
Հունիսի 16-ին ԱԱԾ-ն հանդես եկավ նաև չորրորդ քրեական գործի մասին հայտարարությամբ, որը վերաբերում է արդեն 2017թ-ի Երևանի ավագանու ընտրություններում ԲՀԿ-ի կատարած ընտրախախտումներին:
Նույն օրը ԱԺ–ն որոշեց Գագիկ Ծառուկյանին զրկել անձեռնմխելիությունից և թույլ տալ, որ նրա նկատմամբ քրեական հետապնդում սկսվի
