Ռուբեն Սաֆրաստյանի դիտարկմամբ` վերջին շրջանում Թուրքիայի հեղինակությունը շատ է թուլացել միջազգային ասպարեզում, այդ երկիրը քննադատվում է եվրոպական պետությունների ու ԱՄՆ–ի, նույնիսկ դաշնակիցների կողմից, հետևաբար Թուրքիայի ղեկավարները փորձում են հեղինակության հետագա անկումը կասեցնել տարբեր հնարքներ բանեցնելով։
«Դրանցից մեկն էլ պայքարն է Հայոց ցեղասպանության հայկական պնդումների դեմ, քանի որ հայկական լոբբին արդյունավետորեն գործում է ամբողջ աշխարհում։ Պատահական չէ, որ հայկական հարցը քննարկման առարկա է դարձել Էրդողանի ստեղծած բարձրագույն խորհրդատվական մարմնի նիստի ժամանակ, և այդ կառույցում ընդգրկված են Թուրքիայի խորհրդարանի նախկին նախագահները»,– նշում է ՀՀ ԳԱԱ արևելագիտության ինստիտուտի տնօրենը։
Սաֆրաստյանի կարծիքով` Թուրքիան փորձում է հերթական անգամ իրավական դաշտում պայքարել Հայոց ցեղասպանության իրողության փաստի դեմ։ Բացի դրանից, Թուրքիայում գործում է նաև մոտ 17 տարի առաջ ստեղծված մի խորհուրդ, որն ուսումնասիրում է հատուկ Հայոց ցեղասպանության ճանաչման դեմ ուղղված մեթոդները։ Այդ կառույցն իր աշխատանքներն է իրականացնում Թուրքիայի ազգային անվտանգության խորհրդի նստավայրում։
Թուրքական ուժերը ավերում են եզդիական սրբավայրերը և ստիպում կրոնափոխ լինել. եզդի պատգամավոր
Ակադեմիկոսի փոխանցմամբ` Թուրքիան Հայոց ցեղասպանության միջազգային ճանաչման գործընթացը դիտարկում է իր հեղինակության անկման դրդապատճառներից մեկը և այժմ կենտրոնացել է այդ խնդրի վրա։ Թուրքիան մեծ խաղ է սկսել Մերձավոր Արևելքում, ուստի ռազմական գործողությունների ֆոնին ցանկանում է առաջ տանել նաև գաղափարական, քարոզչական պայքարը։
Սաֆրաստյանի տեղեկացմամբ` Թուրքիայի ռազմական գլխավոր շտաբի համար Հայաստանն ու Հունաստանն այսօր էլ համարվում են հնարավոր պատերազմի հիմնական ուղղությունները, ուստի պատահական չէ, որ շտաբի ակադեմիայում սկսել են ուսումնասիրել հայերենը որպես հակառակորդի լեզու։
