ԵՐԵՎԱՆ, 16 հունիսի – Sputnik. ՀՀ վարչապետ Նիկոլ Փաշինյանը ՀՀ կենտրոնական բանկի նախկին նախագահ Արթուր Ջավադյանին հատուկ հանձնարարություններով դեսպան է նշանակել։
«Ղեկավարվելով «Դիվանագիտական ծառայության մասին» Հայաստանի Հանրապետության օրենքի 16-րդ հոդվածի 1-ին մասով` Արթուր Ջավադյանին նշանակել հատուկ հանձնարարություններով դեսպան»,– նշված է որոշման մեջ։
Փաշինյանը փաստաթուղթը ստորագրել է այսօր` հունիսի 16-ին։
Նշենք, որ Դիվանագիտական ծառայության մասին օրենքի 16-րդ հոդվածի համաձայն` միջազգային հարաբերություններում որոշակի խնդիրներ լուծելու նպատակով վարչապետը կարող է նշանակել հատուկ հանձնարարություններով դեսպան։
Արթուր Ջավադյանը Կենտրոնական բանկի նախագահն էր 2008 թվականից։ Նա 2 անգամ է ընտրվել այդ պաշտոնում։ Ջավադյանի պաշտոնավարման ժամկետը լրացավ հունիսին։ Երեկ Փաշինյանը Կենտրոնական բանկի աշխատակազմին ներկայացրեց ԿԲ նոր նախագահ Մարտին Գալստյանին։
