Էդուրադ Անտինյանի դիտարկմամբ` եթե խոսքը վերաբերում է նրան, որ Ծառուկյանը լինելով խոշոր սեփականատեր կամ զբաղվելով գործարարությամբ, կարող էր ինչ–որ բան խախատած լինել, ապա տեղին չէ, որ իշխանություններն այդ հանգամանքն օգտագործեն քաղաքական դրդապատճառներով։ Նրանք առիթ են ունեցել համագործակցելու Ծառուկյանի հետ, և վերջինս ընտրությունների ժամանակ, որի երաշխավորն էր Փաշինյանը, ստացել է այնքան ձայն, որ հայտվել է ԱԺ–ում, առաջին ընդդիմադիր ուժն է ու երկրորդը` պատգամավորների քանակով։
Քաղաքագետը տարակուսում է`ինչու՞ է հարց առաջանում իշխանությունների մոտ, որ նախկինում ով ինչ աշխատել է, անկախ տրամաչափից, ինչ–որ խախտում արել է, հետևաբար կարող են բոլորին հերթագրել և ամեն օր մեկին կանչել հարցաքննության։ Ըստ նրա` սա ճիշտ մոտեցում չէ։
«Լևոն Տեր–Պետրոսյանի պաշտոնավարման ժամանակ, երբ դու համակարգի մեջ էիր, ինքդ պետք է որոշեիր`կեղտոտվես, թե ոչ։ Ռոբերտ Քոչարյանի օրոք դու կարող էիր մտնել համակարգ, բայց հետո պարտադիր պետք է կեղտոտվեիր, իսկ Սերժ Սարգսյանի պաշտոնավարման ժամանակ իշխանական համակարգ մտնելիս արդեն իսկ դռան առջև դրված էր թասով «կեղտը», մինչև չկեղտոտվեիր, ներս չէիր կարող մտնել»,– նշում է քաղաքագետը։
Ըստ Անտինյանի` նախկինում խաղի կանոնները սահմանել են այն իշխանությունները, որոնց ժողովուրդը մերժել է, ուստի այժմ եթե պայքարում ենք հետևանքի դեմ, ապա պետք է հասկանանք, թե ինչ արդյուքն կստացվի, ու եթե անգամ պարզվի, որ Ծառուկյանը մեղավոր է, ապա ի՞նչ խնդիր է լուծում իշխանությունը։
«Եթե կար ֆինանսական խնդիր, կարող էին կանչել, ասել այդ մասին ու պահանջել, որ փոխհատուցեր, ինչպես պայմանավորվում էին ուրիշների հետ։ Եթե կարծում են, որ գործարարը չպետք է զբաղվի քաղաքականությամբ, ապա կրկնում են Սերժ Սարգսյանի գործելակերպը, ինչը շատ վտանգավոր է։ Մեր օրերում կարող են խախտումներ գտնել բոլոր տնտեսվարողների մոտ, քանզի նախկին համակարգում առանց դրա հնարավոր չէր»,– նշում է քաղաքագետը։
Թանկարժեք մեքենաներ ու առյուծներ. ԱԱԾ–ն հրապարակել է Ծառուկյանի տան խուզարկության կադրերը
Էդուրադ Անտինյանի կարծիքով` մի կողմն ասում է, թե իր դեմ ճնշումները սկսվեցին քաղաքական հայտարարությունից հետո, մյուս կողմն էլ պնդում է, որ նա գիտեր խախտումների ի հայտ գալու մասին, ուստի արեց հայտարարություն, հետևբար երկու կողմերին լսելիս ականատես կլինենք խուլերի բանավեճի, երբ մեկը մյուսին չի լսում։ Անտինյանը շատերի պես տարակուսում է, թե ինչու՞ այս ամենը սկսվեց երկու տարի հետո, կամ ինչու՞ էին ժամանակին Ծառուկյանի հետ հուշագիր ստորագրում, և ինչու՞ էր Ծառուկյանի խմբակցությունն աջակցում Փաշինյանին վարչապետ ընտրվելիս։
Քաղաքագետի համոզմամբ` եթե Գագիկ Ծառուկյանը ձեռնարկի ակտիվ գործողություններ, միևնույն է, դրանից օգտվելու են ուրիշները։ Ըստ նրա` ամենամեծ խնդիրն այն է, որ մարդիկ ապագայի հետ կապված ունեն տագնապներ, հետևաբար իշխանությունը պետք է նախևառաջ մտածի համավարակի սոցիալ–տնտեսական հետևանքների, այլ ոչ թե սրան–նրան շարքից հանելու մասին։
Հիշեցնենք, ոև ՀՀ ԱԱԾ-ն հունիսի 14-ին խուզարկություն իրականացրեց ԲՀԿ առաջնորդ, պատգամավոր Գագիկ Ծառուկյանի` Առինջում գտնվող առանձնատանը: Ավելի ուշ Ծառուկյանին հրավիրեցին ԱԱԾ՝ հարցաքննության: Նրա աջակիցները հավաքվեցին ԱԱԾ շենքի դիմաց՝ պահանջելով դադարեցնել Ծառուկյանի նկատմամբ հետապնդումն ու ՀՀ վարչապետ Նիկոլ Փաշինյանի հրաժարականը:
Ծառուկյանի հարցաքննության ընթացքում ԱԱԾ-ն հանդես եկավ մի քանի պաշտոնական հայտարարություններով, որտեղ ներկայացրեց Ծառուկյանի նկատմամբ կատարված քննչական գործողությունների իրավական հիմքերն ու հարուցված 3 քրեական գործերը:
Այսպես՝ առաջին քրեական գործը վերաբերում է «Օնիրա Քլաբ» ՍՊԸ-ին պատկանող «Օնիրա Քլաբ» ու «Շանգրի Լա» խաղատների գործունեությանը, որոնք ներկայացվել են որպես 61.146.139.340 մլրդ ՀՀ դրամի ներդրում և պետությանը պատճառել 29.750.000.000 ՀՀ դրամի վնաս:
Երկրորդ քրեական գործով բացահայտվել են ԲՀԿ-ի՝ ընտրակաշառք բաժանելու հարյուրավոր դեպքեր, որում ներգրավված են եղել նաև ԲՀԿ ղեկավար անդամները:
«Խնձոր կերեք». ձայներ բերելու առնչությամբ ԲՀԿ–ական պատգամավորների արձագանքը
Երրորդ քրեական գործը վերաբերում է Կոտայքի մարզի Առինջ համայնքում Ծառուկյանին պատկանող «Նյու» ընկերությանը օտարված հողատարածքին: Ըստ քրեական գործի՝ Առինջի գյուղապետի ու ավագանու անդամների անօրինական որոշումների արդյունքում համայնքին պատճառվել է շուրջ 400 մլն դրամի վնաս: Երեք քրեական գործերով նախաքննությունը շարունակվում է:
