ԵՊՀ ռեկտորի մամուլի խոսնակ Գևորգ Էմին–Տերյանի տեղեկացմամբ` այս պահին հոգաբարձուների խորհուրդը ձևավորվում է դեռևս գործող օրենքով, որի շուրջ դժգոհություններ կային: Նոր տարբերակում ուսանողների թվաքանակը նվազեցված է, իսկ համալսարանի ներկայացուցիչների ընդհանուր թիվը պակաս է 30 տոկոսից, սակայն այն դեռ նախագիծ է, որը պետք է հանգամանորեն քննարկվի։
Անդրադառնալով այն հարցին, որ հոգաբարձուների խորհրդի կազմում կառավարության ներկայացուցիչների ընդգրկումով կառույցի գործունեությունն անհարկի քաղաքականացվում էր, Գևորգ Էմին–Տերյանն ընդգծեց, որ ԵՊՀ կանոնադրության մեջ նշված է, թե ինչ չափանիշների պետք է համապատասխանեն հիմնադիր և լիազոր անդամները։
«Տարիներ առաջ ԵՊՀ հոգաբարձուների խորհուրդը ղեկավարում է ՀՀ նախագահը, և այդ իրողությունը մեծ դժգոհություն էր առաջացնում հատկապես ընդդիմադիրների շրջանում։ Մենք տեսանք, որ նոր կառավարությունը փորձեց զերծ մնալ այդ պրակտիկայից։ Կային երկու անդամներ` Հովհաննես Հովհաննիսյան և Համազասպ Դանիելյան, որոնք Ազգային ժողովի «Իմ քայլը» դաշինքի պատգամավորներ էին, սակայն հոգաբարձուների կազմի ձևավորման պահին երկրորդը որևէ պաշտոն չէր զբաղեցնում, իսկ առաջինը փոխնախարար էր»,– Sputnik Արմենիայի հետ զրույցում տեղեկացրեց ԵՊՀ ռեկտորի մամուլի խոսնակը։
Էմին–Տերյանի կարծիքով`ակնառու է, որ ապաքաղաքականացումը ներկայումս գուցե նվազ արդյունավետ է, քան նախկինում, երբ հոգաբարձուների կազմում ընդգրկված էին պաշտոնատար անձինք, որովհետև առաջանում են բազմաթիվ խնդիրներ, սակայն հոգաբարձուների խորհրդի նախագահը դրանց չի արձագանքում։ Օրինակ` ռեկտորի ընտրության հարցը ձգձգվում է, այս ընթացքում գրանցվեցին սկանդալներ, տեղի ունեցավ ուսխորհրդի նախագահի ձերբակալություն, սակայն հոգաբարձուների խորհրդի նախագահը ոչ մի կերպ չանդրադարձավ դրանց։
ԵՊՀ ռեկտորի ընտրությունը հետաձգվեց
«Անշուշտ համալսարանի շահերից է բխում, որ հոգաբարձուների խորհուրդն աշխատի լիարժեքորեն և չպետք է քաղաքականացվի` ծառայելով քաղաքական առանձին խմբերի շահերին։ Պետք է գտնել այն արդյունավետ ուղին, որի շնորհիվ և՛ համալսարանը կզարգանա, և՛ նման խնդրահարույց հարցեր չեն առաջանա»,– նշեց նա։
Իսկ թե ինչու է ձգձգվում ԵՊՀ ռեկտորի ընտրությունը, ըստ Էմին–Տերյանի՝ ԵՊՀ–ն բարդ հիմնարկ է, կառավարությունն ի դեմս ԿԳՄՍ նախարարի փորձում է մշակել «Բարձրագույն կրթության և գիտության մասին» նոր օրենքի նախագիծը, որը ներկայացվելու է ԱԺ–ին։ Բացի այդ, համալսարանի աշխատակիցներից մեկը դիմել է դատարան`պնդելով, որ Գեղամ Գևորգյանն ապօրինաբար է նշանակվել ԺՊ, քանի որ ըստ «Հիմնադրամների մասին» օրենքի` հիմնադրամի կառավարիչը կարող է վճարովի այլ աշխատանք կատարել միայն հոգաբարձուների խորհրդի համաձայնությամբ, սակայն համալսարանի հիմնադրամի կառավարիչ Գևորգյանի պարագայում այդ համաձայնությունը չի եղել։ Վերջինս հոգաբարձուների խորհրդին չի հայտնել, որ հանդիսանում է «Էվոկա» բանկի խորհրդի նախագահի տեղակալ։ Էմին–Տերյանի հաղորդմամբ` կա ևս մեկ իրավական ակտ, որի համաձայն ԿԲ–ն արգելում է բանկերի խորհուրդների անդամներին համատեղության կարգով զբաղվել այլ աշխատանքով, և Գևորգյանը խախտել է նաև այդ նորմատիվ ակտը։
