ԵՐԵՎԱՆ, 12 հունիսի – Sputnik․ ՀՀ ԱԳՆ մամուլի քարտուղար Աննա Նաղդալյանը Sputnik Արմենիայի թղթակցի հետ զրույցում ասաց, որ ՀՀ արտգործնախարարությունը պատրաստ է աջակցել բժիշկներին, որոնք կորոնավիրուսի դեմ պայքարում օգնելու համար Հայաստան գալու ցանկություն են հայտնել։
«Ընդունելով ՀՀ ԱՆ կոչը՝ ռուսաստանաբնակ, ազգությամբ հայ բժիշկները հանդես են եկել օգնելու նախաձեռնությամբ: Վերջիններս մշտական կապի մեջ են ՌԴ-ում ՀՀ դեսպանության հետ, և մենք պատրաստ ենք ամեն կերպ աջակցել այդ նախաձեռնությունը կյանքի կոչելու գործում»,-ասաց Նաղդալյանը։
Ավելի վաղ համացանցում տարածվել էր Գ․Գ․ Մելքոնյան անունով օգտատիրոջ գրառումը, որը երեկ հանդես էր եկել բժիշկների խումբ հավաքելու և պատմական հայրենիք գալու կոչով։
«Հայաստանում այսօր կորոնավիրուսի տարածման հետ կապված ծայրահեղ իրավիճակ է։ Փաստացի հիվանդացության պայթյունավտանգ աճ է գրանցվում։ Առողջապահական համակարգի ռեսուրսները սպառման եզրին են։ Հիմա որևէ մեկի մեղավորության հարցը քննարկելու ժամանակը չէ։ Բռնկումը տեղայնացնելու և մարելու համար արագ գործողություններ են հարկավոր։ Այդ պատճառով կոչ եմ անում իմ գործընկերներին՝ ովքեր այս պահին արձակուրդ վերցնելու հնարավորություն ունեն, հավաքվեք և եկեք Երևան՝ օգնությունը անմիջապես տեղում կազմակերպելու համար»,-գրել է նա։
Բժիշկն ընդգծել է, որ առաջին հերթին անհրաժեշտ են թոքաբաններ, ռեանիմատոլոգներ, թերապևտներ, ինֆեկցիոնիստներ և համաճարակաբաններ։
Նա ավելացրել է, որ յուրաքանչյուր օրը նշանակություն ունի, և Մոսկվայում ձեռք բերված փորձը կարող է օգնել Հայաստանին։
«Բոլորի համար, ովքեր անձամբ պատրաստ են օգնել, թռիչքը և կեցության հարցը կկազմակերպվի ընդունող կողմի հաշվին։ Այս պահին անհրաժեշտ է անհապաղ կազմել այն բժիշկների ցուցակը, որոնք պատրաստ են մեկնել Հայաստան։ Ժամկետներն ու ամսաթվերը հայտնի կդառնան մոտակա երկու օրում։ Նախապես շնորհակալ եմ բոլոր նրանց, ովքեր արձագանքել են օգնության կոչին»,-գրել է նա։
Այս օգտատերը մեզ հետ զրույցում հայտնեց, որ արդեն ավելի քան 50 բժիշկ է արձագանքել կոչին, ընդ որում` ոչ միայն հայ մասնագետներ։
Առողջապահության նախարար Արսեն Թորոսյանն էլ է արդեն հայտնել, որ հիսուն բժիշկ Ռուսաստանից և տասը մասնագետ Ֆրանսիայից կժամանեն Հայաստան՝ օգնելու կորոնավիրուսի դեմ պայքարին։ Հիմա քննարկվում է արտակարգ դրության պայմաններում աշխատանքի փորձ ունեցող բժիշկների Հայաստան ժամանելու հարցը։
Լիտվան և Վրաստանը արդեն հայտարարել են բժիշկներին Հայաստան գործուղելու մտադրության մասին։ Մինչ այդ Չինաստանն ու Ռուսաստանը Հայաստանին օգնություն էին հատկացրել դեղամիջոցների և թոքերի արհեստական օդափոխության սարքավորումների տեսքով։ Բացի այդ, ապրիլի 7-ից ռուսական նորագույն ախտորոշիչ լաբորատորիան Հայաստանում կորոնավիուսի թեստավորում է իրականացնում։
