ԵՐԵՎԱՆ, 12 հունիսի - Sputnik. Այսօր Ազգային ժողովում ճեպազրույցի ժամանակ լրագրողները ՀՀ առողջապահության նախարար Արսեն Թորոսյանից հետարքրքվեցին` արդյո՞ք աշնանը կորոնավիրուսի անկում կլինի։ Ի պատասխան Թորոսյանը նշեց, որ ստիպված է տխրեցնել, քանի որ բոլոր սուր շնչառական վարակներն աշնանն ակտիվանում են։
«Կախված եղանակային պայմաններից` յուրաքանչյուր երկրում սուր շնչառական վարակներն ակտիվանում են աշնան սկզբին կամ վերջին։ Մեզ մոտ նոյեմբերի վերջին են հիմնականում դրանք ակտիվանում։ Այդ շրջանում մարդիկ ավելի շատ են մնում տներում` չօդափոխելով տարածքը, ինչն էլ վարակի տարածման համար նպաստավոր պայման է»,–ասաց Թորոսյանը։
Նախարարի խոսքով` նույնիսկ վարակը հաղթահարած երկրների մոտ ձմեռային սեզոնին կորոնավիրուսի տարածման վտանգը մնում է։
Նա նշեց նաև, որ նաև այդ պատճառով է, որ առողջապահական համակարգի հզորությունները զարգացնելիս հաշվի չեն առնում միայն այս պահի կարիքը։
Հիշեցնենք` հունիսի 12-ի, ժամը 11:00-ի դրությամբ Հայաստանում հաստատվել է կորոնավիրուսային հիվանդության ընդհանուր 15281 դեպք, որոնցից 5639-ն առողջացած, 258-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 9298 պացիենտ: Ընդհանուր առմամբ կատարվել է 77686 թեստավորում:
Վերջին մեկ օրում ունենք կորոնավիրուսային հիվանդությամբ հաստատված 612 նոր դեպք և 173 առողջացած։
Դեռ վաղ է խոսել կորոնավիրուսի աճի տեմպերի անկման մասին. Թորոսյան
