ԵՐԵՎԱՆ, 12 հունիսի – Sputnik. ՀՀ առողջապահության նախարար Արսեն Թորոսյանն Ազգային ժողովում լրագրողների հետ զրույցում նշեց, որ լինելու են բժշկական կենտրոններ, որոնք պետք է հեռու մնան կորոնավիրուսից։
«Կան առողջապահական սկզբունքներ, ըստ որոնց էլ որոշվում է այս կամ այն ԲԿ–ի կորոնավիրուսի բուժմամբ զբաղվելու ֆակտորը։ Բացի այդ, առողջապահական ոլորտը միայն կորոնավիրուսի բուժմամբ չի զբաղվում, այլ նաև ուրիշ հիվանդություններով»,–ասաց նախարարը։
Անդրադառնալով ԵՊԲՀ 1-ին կլինիկական հիվանդանոցի հետ կապված աղմուկին, թե ունեն ազատ մահճակալներ, բայց իրենց չեն ընդգրկել կորոնավիրուսի բուժման պրոցեսին, նախարարը նշեց, որ դա այն դեպքն է, երբ մրջյունը փիղ է դարձել։
Հարցին, թե էլ ո՞ր ԲԿ–ներն ընդգրկված չեն այդ գործընթացում` նախարարը պատասխանեց, որ, օրինակ, «Նաիրի» ԲԿ–ն չի մասնակցելու կորոնավիրուսի բուժմամբ։ Դա, ըստ նախարարի, ճիշտ որոշում է, և այդ որոշումն ուժի մեջ է։
Թորոսյանը վստահեցրեց, որ անձնական որևէ ամբիցիա չկա որոշումներում։
Հիշեցնենք, որ երգահան, ԵՊԲՀ հոգաբարձուների խորհրդի նախագահ Վահան Արծրունին Facebook-ի իր էջում գրառում էր կատարել՝ նշելով, թե մարտ ամսից ԵՊԲՀ 1-ին կլինիկական հիվանդանոցում հատուկ Covid-բաժանմունք (մեկուսարան) է առանձնացվել։ Այն զինված է մասնագետներով, սարքավորումներով և բժշկական միջոցներով։ Արծրունու խոսքով՝ մեկուսարանը դատարկ է մնացել և չի գործածվել անհայտ պատճառներով։
Շտապօգնությունը 38–ից ցածր ջերմություն ունեցողներին հիվանդանոց չի տանում
Արսեն Թորոսյանի խոսնակ Ալինա Նիկողոսյանը, անդրադառնալով հայտարարությանը, ասել էր, որ առաջին անգամը չէ, որ ականատես են լինում Երևանի պետական բժշկական համալսարանի ներկայացուցիչների նման պահվածքին, մասնավորապես ոտք գցելուն (подножка)՝ նախարարության ներկայացուցիչների և ԵՊԲՀ-ի միջև պայմանավորվածություններ ձեռք բերելուց հետո, այս կամ այն ծառայությունների մատուցման վերաբերյալ։
