ԵՐԵՎԱՆ, 10 հունիսի – Sputnik. Կավասակիի համախտանիշի ևս մեկ դեպք է գրանցվել Հայաստանում, այս անգամ` 9–ամյա մի երեխայի մոտ։ Sputnik Արմենիայի հետ զրույցում տեղեկությունը հայտնեց առողջապահության նախարարի մամուլի խոսնակ Ալինա Նիկողոսյանը։
«Ինը տարեկան երեխայի առողջական վիճակն ի սկզբանե ծանր է եղել, սակայն այս պահին նրա մոտ կլինիկական բարելավում է նկատվում։ Երեխայի վիճակը կայունացել է»,–ասաց Նիկողոսյանը։
Երեխայի մոտ մինչ այդ կորոնավիրուս էր հայտնաբերվել։
Ինչ վերաբերում է 4 տարեկան երեխային, որի դեպքում նույնպես Կավասակիի համախտանիշ էր ախտորոշվել, ապա, Նիկողոսյանի խոսքով, նա արդեն դուրս է գրվել հիվանդանոցից, բայց բժիշկների հսկողության տակ է լինելու։
Հիշեցնենք` Կավասակիի համախտանիշի առաջին դեպքի մասին հայտնի դարձավ հունիսի 3-ին։ Հունիսի 5-ին «Սուրբ Աստվածամայր» ԲԿ–ն հայտարարություն տարածեց` տեղեկացնելով, որ 4-ամյա երեխայի մոտ կորոնավիրուսով վարակվելուց հետո ի հայտ են եկել պարանոցային մկանների արտահայտված կարկամություն, ներբանների, ափերի, դեմքի, որովայնի ցանավորում, այտուցներ վերջույթներին ու դեմքին, ինչպես նաև հավաքվել էր հեղուկ որովայնի խոռոչում: Մի քանի օրերի ընթացքում երեխայի մոտ գրանցվել է բարձր տենդ։ Նրա մոտ հայտնաբերվել էր տասներկումատնյա աղու խոց։
Նշենք, որ Կավասակիի ախտանշաններն են՝ տենդը, մաշկի ցանը, այտուցները, արյունոտ աչքերը, սրտամկանի դիսֆունկցիան, որովայնի ցավը, փորլուծությունը և այլն:
