Գեորգի Ավետիսյանի փոխանցմամբ` Մարտունի կատարած այցը նախապես պլանավորված էր, և իրականացվել էր պարետատան ցուցումները կատարելու համար։ Ըստ նրա` առհասարակ վերոհիշյալ շուկան խնդրահարույց է, քանի որ տեսչական մարմինը տևական ժամանակ փորձում է տեղում կանոնակարգել մասնավորապես անասնաշուկայի հատվածը։
«Անասունների վաճառքի մասով շուկա որպես այդպիսին չկա, և ոչ ոք պատասխանատու չէ այդ հատվածի համար, հետևաբար որոշեցի ինքս գնալ, տեսնել, թե ինչ պատկեր է այնտեղ, որ հասկանանք` ինչ պետք է անենք։ Անասնաշուկայից բացի, շրջեցինք նաև շուկայի մյուս հատվածում »,–նշում է ՍԱՏՄ ղեկավարը։
Գեորգի Ավետիսյանի տեղեկացմամբ` շրջայցի արդյունքում պարզվեց, որ կոնկրետ անասնաշուկայի հատվածում մարդիկ դիմակ կրում էին, ունեին ախտահանիչներ, իսկ շուկայի մյուս հատվածում գրանցվել են մի շարք խախտումներ, օրինակ` չեն եղել դիմնակների ու ձեռնոցների համար նախատեսված փակ աղբարկղեր, չի պահպանվել սոցիալական հեռավորությունը, աշխատակիցների ջերմաչափումը լիարժեք չի կատարվել, բացակայել են ախտահանման և ջերմաչափման գրանցամատյանները։
«Ի զարմանս ինձ, մարդկանց մոտ այդուհանդերձ կար պահի գիտակցության լրջություն։ Նույնիսկ նրանք, ովքեր դիմակը պատշաճ չէին կրում, մեզ տեսնելով` ուղղում էին»,– նշում է ՍԱՏՄ ղեկավարը։
Գեորգի Ավետիսյանը էական տարբերություն է տեսնում Մարտու և Մեյմանդարի շուկաների միջև։ Թեև Մեյմանդարի շուկայում եղել են տեսչական մարմնի տեսուչները և ոչ անձամբ ղեկավարը, սակայն նրանց կողմից գրանցված խնդիրները վկայում են այդ տարբերության մասին։ Ըստ Ավետիսյանի` Մեյմանդարի շուկան կազմակերպված բնույթ ունի, նորմալ սարքված է, իսկ Մարտունու շուկայում հախուռն պատկեր է, ավելի շատ վաճառակետեր են, բայց մարդկանց կողմից ցուցաբերված մոտեցման առումով Մարտունիում համաճարակաբանական վիճակն ավելի լավ էր։
Խախտումներին առնչվող պատժամիջոցների առթիվ ՍԱՏՄ ղեկավարը նշեց, որ արձանագրությունները կուղարկեն պարետատուն, որն էլ կկայացնի համապատասխան որոշումներ։ Տեսչական մարմնի ստուգայցերը հետայսու նույնպես լինելու են պատահական, որ ձեռնարկատերերը չիմանան և չփորձեն տեղային լուծումներ գտնել։ Իսկ պարետատան հետ կա շուրջօրյա սերտ համագործակցություն։
