ԵՐԵՎԱՆ, 5 մայիսի - Sputnik. ՊԵԿ արդեն նախկին նախագահ Դավիթ Անանյանի անակնկալ հրաժարականից հետո շատերն են փորձում կռահել նրա աշխատանքից ազատվելու պատճառը. ակտիվ քննարկվում է նաև, թե ով կփոխարինի նրան այդ պաշտոնում:
ՊԵԿ-ի շուրջ կատարվող գործընթացներից «Ժողովուրդ» օրաթերթին որոշ մանրամասներ են հայտնի դարձել: Մասնավորապես, աղբյուրի հաղորդմամբ՝ Պետական վերահսկողական ծառայությունը վերջերս ստուգումներ է սկսել ՊԵԿ-ում: Օրաթերթի հետ զրույցում ՊՎԾ մամուլի խոսնակ Սեդա Աղբալյանը հաստատել է ստուգումներ անցկացնելու մասին տեղեկությունները. դրանք մեկնարկել են մայիսի 12-ի հրամանագրով: Աղբալյանը նշել է, որ որոշակի ռիսկեր են վեր հանվել, որոնց հիման վրա նախաձեռնվել է լայնածավալ ուսումնասիրություն:
«Արդյոք այս ստուգումներն ու հնարավոր բացահայտումները կարող էին աշխատանքից հեռացման պատճառ դառնալ, թե ոչ՝ ցույց կտա ժամանակը: Այնուամենայնիվ, Անանյանի՝ աշխատանքից ազատման լուրից հետո սկսվեցին խոսակցությունները նրան փոխարինողի մասով: Մեր տեղեկություններով՝ ավելի շատ քննարկվում է Դավիթ Անանյանի տեղակալներից Շուշանիկ Ներսիսյանի անունը՝ որպես նրան ամենահավանական փոխարինող։ Գաղտնիք չէ, որ նա այս իշխանությունների համակրանքն է վայելում, և կարծիքներ կան, թե նրան կառավարելը հեշտ է: Եվ չնայած ՊԵԿ-ում մեծ ազդեցություն ունի նաև Ռաֆիկ Մաշադյանը, սակայն, ամենայն հավանականությամբ, ընտրությունը թերևս նրա վրա կանգ չի առնի»,-գրում է «Ժողովուրդ» թերթը:
«Կարգապահ հարկատուն ՊԵԿ–ի հետ պետք է խնդիր չունենա` անկախ վարակից». Գրիգորյան.
Թերթի տեղեկություններով՝ ՊԵԿ նախագահի աշխատանքից հեռանալը անակնկալ էր ինչպես ՊԵԿ-ի ներսում, այնպես էլ այդ կառույցից դուրս, թեպետ, ըստ աղբյուրի, ՔՊ-ն այնքան էլ գոհ չի եղել Անանյանից` նրան համարելով փափուկ կառավարիչ, «հներին», օլիգարխներին չպատժող տեսակ, ինչին մի առիթով Անանյանը հակադարձել է. «Բոլոր դեպքերում չէ, որ պետք է պաշտոններից հանենք մարդկանց ու երիտասարդ անփորձ կադրերով փոխարինենք»: Այս արտահայտությունը, ըստ օրաթերթի՝ մշտապես հիշվել է ՔՊ վարչության նիստերում թեմատիկ քննարկումների ժամանակ:
Անանյանն ինքը, աշխատանքից ազատվելու պատճառների մասին հրապարակավ ոչինչ չասաց, միայն հակիրճ շնորհակալություն հայտնեց. «Շնորհակալություն եմ հայտնում բոլորին արդյունավետ և արգասաբեր համագործացկության, ինչպես նաև ՀՀ Վարչապետ Նիկոլ Փաշինյանին ավելի քան երկու տարի այս պատասխանատու պաշտոնն ինձ վստահելու համար»:
«Այս ոչինչ չասող տեքստը բազում հարցեր է առաջացնում: Մասնավորապես, արդյոք Անանյա՞նն է ցանկություն հայտնել հեռանալ, թե՞ վարչապետն է այդ մասին ասել։ Սա շատ կարևոր հանգամանք է՝ հաշվի առնելով նաև առցանց ասուլիսի ժամանակ Փաշինյանի ձևակերպումներից մեկը՝ կապված հեռացող պաշտոնյաների հետ: «Դեպքերի շատ մեծ մասում ինձ չի անհանգստացնում, ընդհակառակը, ես շատ ուրախ եմ լինում նման զարգացման համար», – նշել էր վարչապետը` թիմից հեռացող կադրերի մասին խոսելով: Հետաքրքիր է՝ Անանյանի հեռանալը անհանգստացնո՞ղ դեպքերից է, թե՞ ոչ»,- գրում է թերթը:
Հիշեցնենք՝ երեկ՝ հունիսի 4-ին հայտնի դարձավ, որ ՊԵԿ նախագահ Դավիթ Անանյանը աշխատանքից ազատման դիմում է գրել: Անանյանը այս պաշտոնը զբաղեցնում էր 2018 թ. մայիսից:
Մինչ այդ` 2016-2018 թթ–ին, եղել է ՀՀ ֆինանսների նախարարի տեղակալը։
