ԵՐԵՎԱՆ, 4 հունիսի – Sputnik. ՀՀ երկրորդ նախագահ Ռոբերտ Քոչարյանը, որի նկատմամբ խափանման միջոց է ընտրված կալանավորումը, հայց է ներկայացրել վարչական դատարան՝ ընդդեմ Արդարադատության նախարարության Քրեակատարողական ծառայության։
Ռոբերտ Քոչարյանի պահանջը վերաբերում է ԱՆ «Երևան-Կենտրոն» ՔԿՀ-ում Ռոբերտ Սեդրակի Քոչարյանի իրավունքի խախտումը վերացնելուն պարտավորեցնելուն՝ որևէ կերպ չսահմանափակել նրա տեսակցությունները և հեռախոսային խոսակցությունները։
Հայցադիմումը ստացվել է հունիսի 2-ին, դատարանում Ռոբերտ Քոչարյանին ներկայացնելու է փաստաբան Հայկ Ալումյանը։ Հայցադիմումը մակագրվել է վարչական դատարանի դատավոր Արծրուն Միրզոյանին։
Մինչև համավարակի ավարտը Ռոբերտ Քոչարյանը կշարունակի մնալ հիվանդանոցում
Քոչարյանն այս տարվա ապրիլի 8-ին էլ էր նույն պահանջով հայցադիմում ներկայացրել դատարան, որը մակագրվել էր դատավոր Գոռ Թորոսյանին։ Ապրիլի 20-ին դատավորը մերժել էր հայցադիմումը։
Հիշեցնենք՝ 2018 թվականի հուլիսի 26-ին ՀՀ պաշտոնաթող նախագահ Ռոբերտ Քոչարյանին մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։ Ռոբերտ Քոչարյանի հանդեպ խափանման միջոցն ընտրվել էր կալանավորումը։
Երկրորդ նախագահի փաստաբանները պնդում են՝ 2008 թ.–ին ՀՀ Քրեական օրենսգրքում չի եղել Սահմանադրական կարգը տապալելու վերաբերյալ 300.1-ին հոդված, այն ավելացվել և ուժի մեջ է մտել միայն 2009թ.–ի մարտի 18–ին, հետևաբար այս հոդվածը չի կարող տարածվել 2008-ին նախագահի պաշտոնը զբաղեցրած Քոչարյանի վրա։
ՄԻԵԴ-ը հրապարակել է Ռոբերտ Քոչարյանի գործով ՍԴ հարցման խորհրդատվական կարծիքը
