ԵՐԵՎԱՆ, 1 հունիսի – Sputnik. Դատարանը բոլոր հիմքերն ունի ՀՀ երկրորդ նախագահ Ռոբերտ Քոչարյանի և մյուսների դեմ հարուցված քրեական գործով հաջորդ դատական փուլ անցնելու։ Ազգային ժողովի նիստի ժամանակ նման կարծիք հայտնեց գլխավոր դատախազ Արթուր Դավթյանը` պատասխանելով ԱԺ պաշտպանության հարցերի մշտական հանձնաժողովի նախագահ Անդրանիկ Քոչարյանի հարցին, թե ինչ է անում դատախազությունը, որպեսզի Քոչարյանի պաշտպանների կողմից դատական նիստերի հետաձգմանը վերջ տրվի։
«Մեր դիրքորոշումներում կարմիր գծով անցել է հետևյալը` պաշտպանության կողմի նմանատիպ վարքագիծն ակնհայտորեն պաշտպանական իրավունքի չարաշահման վկայություն է։ Գտնում ենք, որ հենց այս հիմնավորմամբ դատարանն իրավունք ունի անցնելու դատաքննության, ապացույցների հետազոտման»,–ասաց Դավթյանը։
Նրա խոսքով` մոտավորապես մեկ տարի է՝ քրեական գործը դատարանի վարույթում է, և գրեթե ամեն նիստին պաշտպանների կողմից խափանման միջոցի փոփոխման միջնորդություն է ներկայացվել: Դավթյանը հիշեցրեց` դատարանը ֆիքսել է, որ քննության ներկա փուլում` նախապատրաստական մասում, Քոչարյանի պատշաճ վարքագծի ռիսկեր կան Դատախազը վստահեցրեց` քանի դեռ քննության այս փուլը չի փոխվել, ու չեն անցել դատաքննության փուլ, այդ ռիսկերը վերանալու մասին խոսք լինել չի կարող:
Հիշեցնենք, որ մայիսի 8-ին Քոչարյանի խափանման միջոցը փոխելու վերաբերյալ դատական նիստում ՀՀ նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանի, ինչպես նաև Արցախի նախկին վարչապետ Անուշավան Դանիելյանը Քոչարյանի խափանման միջոց կալանքը անձնական երաշխավորությամբ փոխարինելու միջնորդություն էին ներկայացրել։ Սակայն դատարանը մերժել էր այդ միջնորդությունը։
Ռոբերտ Քոչարյանի պաշտպանները հետ են վերցրել վերաքննիչ բողոքները
Ավելի վաղ դատարանը պաշտպանների ներկայացրած` Քոչարյանի խափանման միջոց կալանքը փախելու միջնորդություններից հերթականը մերժելով` հայտնել էր, որ ազատության մեջ գտնվելով Քոչարյանը կարող է խոչընդոտել քննության ընթացքը։
Հիշեցնենք՝ 2018 թվականի հուլիսի 26-ին ՀՀ պաշտոնաթող նախագահ Ռոբերտ Քոչարյանին մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։ Ռոբերտ Քոչարյանի հանդեպ խափանման միջոցն ընտրվել էր կալանավորումը։
Երկրորդ նախագահի փաստաբանները պնդում են՝ 2008 թ.–ին ՀՀ Քրեական օրենսգրքում չի եղել Սահմանադրական կարգը տապալելու վերաբերյալ 300.1-ին հոդված, այն ավելացվել և ուժի մեջ է մտել միայն 2009թ.–ի մարտի 18–ին, հետևաբար այս հոդվածը չի կարող տարածվել 2008-ին նախագահի պաշտոնը զբաղեցրած Քոչարյանի վրա։
Մինչև համավարակի ավարտը Ռոբերտ Քոչարյանը կշարունակի մնալ հիվանդանոցում
